Addım
“British Journal of Sports Medicine” jurnalında dərc edilən yeni araşdırmaya görə, yaşlı qadınların həftədə cəmi bir və ya iki gün gündə 4 min addım atması onların ölüm və ürək-damar xəstəlikləri riskini azalda bilər.
AZƏRTAC xəbər verir ki, tədqiqat ABŞ-da aparılıb və 13 547 qadın (orta yaş 71) təxminən 11 il ərzində izlənilib. Nəticədə məlum olub ki, həftədə bir-iki gün bu səviyyədə addım atan qadınlarda bütün səbəblərdən ölüm riski 26 faiz, ürək-damar xəstəliklərindən ölüm riski isə 27 faiz aşağı olub. Qadınlar həftədə ən azı üç gün bu qədər addım atırlarsa, ümumi ölüm riski 40 faizə qədər azalır.
Tədqiqatçılar bildiriblər ki, addımlama tezliyindən çox, ümumi addım sayı sağlamlıq üçün əsas amildir. Yəni, addımlar günlərə “paylanmasa” da, ümumi həcm vacibdir. Mütəxəssislər hesab edirlər ki, bu nəticələr gələcək fiziki fəaliyyət təlimatlarına addım sayının daxil edilməsinə dair əlavə sübut yaradır. Yaşlı insanlar sağlam qalmaq üçün hər gün çox gəzməyə məcbur deyillər. Əsas məsələ ümumi addım sayını artırmaqdır.
