“Hazırda “Şahdəniz Alfa” platformasından hasilat və ixrac əməliyyatları tədricən artırılmaqdadır. Əməliyyatların normal səviyyəyə çatmasının daha bir neçə gün çəkəcəyi gözlənilir. Planlarımızı və fəaliyyətlərimizi SOCAR və digər tərəfdaşlarımızla koordinasiya etməklə onlarla yaxından işləməkdə davam edirik”, – deyə açıqlamada bildirilir.
BP şirkətinin sözçüsü Tamam Bayatlı bildirmişdi ki, Platformanın özündə hər hansı problem yoxdur. “Texniki nasazlıq Alpha platformasını Səngəçal terminalı ilə birləşdirən sualtı boru kəmərində aşkar edilib. Ehtiyat tədbiri olaraq, platformada əməliyyatlar dayandırılıb”, Bayatlı qeyd edib.
Bayatlı vurğulayıb ki, platforma, onun personalı və əlaqəli qurğular tam təhlükəsizlikdədir.
Bakıdan 70 kilometr cənub-şərqdə, Xəzər dənizinin cənub hissəsində yerləşən Şahdəniz yatağı ilk dəfə 1954-cü ildə sovet geoloqları tərəfindən kəşf edilib. Bu ərazi, geoloji baxımdan, Xəzər dənizinin qalan hissəsindən Böyük Qafqaz və Köpetdağ dağ quruluşlarının sualtı davamları ilə ayrılan Cənubi Xəzər Çökəkliyinə aiddir.
“Şahdəniz” perspektiv sahəsinin kəşfiyyatı, işlənməsi və hasilatın pay bölgüsü haqqında saziş 1996-cı il iyunun 4-də imzalanıb. “Şahdəniz” üzrə hasilatın pay bölgüsü (PSA) sazişi 17 oktyabr 1996-cı ildə Azərbaycan parlamentində ratifikasiya olunub.
2013-cü il dekabrın 17-də Bakıda imzalanmış sənədlərə görə “Şahdəniz” yatağının işlənməsi ilə bağlı PSA sazişinin müddəti 2036-cı ildən 2046-cı ilədək uzadılıb.
