Türkiyə Cənubi Qafqazdan keçən və regionu Türkiyə ərazisi ilə birləşdirən Orta dəhlizi beynəlxalq ticarət və nəqliyyat əlaqələrinin inkişafının əsas elementlərindən biri hesab edir.
Bu barədə Türkiyənin xarici işlər naziri Hakan Fidan “Anadolu” agentliyinə açıqlamasında bildirib.
Onun sözlərinə görə, nəqliyyat marşrutlarının şaxələndirilməsi strateji zərurətə çevrilir. Çünki bu, bazarlara çıxış imkanlarını genişləndirməyə və qlobal təchizat zəncirlərini möhkəmləndirməyə imkan verir.
Fidan vurğulayıb ki, Türkiyə öz coğrafi mövqeyinə yalnız qitələri birləşdirmək imkanı kimi deyil, həm də strateji məsuliyyət kimi yanaşır. Bu potensialın reallaşdırılması üçün inkişaf etmiş infrastruktur, diplomatik səylər və nəqliyyat marşrutlarının təhlükəsizliyinin artırılması vacibdir.
Türkiyəli nazir digər perspektivli layihə kimi Fars körfəzini İraq və Türkiyə üzərindən Avropa ilə birləşdirəcək nəqliyyat marşrutunun yaradılmasını da qeyd edib. Ankara, həmçinin enerji marşrutlarını və təchizat mənbələrini şaxələndirməyə çalışır.
Fidanın sözlərinə görə, bu cür layihələr yeni iqtisadi imkanlar yaratmağa və siyasi əməkdaşlığı gücləndirməyə qadir olan daha geniş regional əlaqələr sisteminin tərkib hissəsidir.
