Uels şahzadəsi Dianaya (1961-1997) məxsus ziyafət paltarı Nyu-Yorkdakı Sotheby’s satış evində hərraca çıxarılıb.
Bu barədə satış evinin mətbuat xidməti məlumat yayıb.
Modelyer Viktor Edelşteyn tərəfindən 1989-cu ildə hazırlanan tünd badımcan rəngli məxməri paltar 1997-ci ildə – Diananın ölümündən bir ay əvvəl hərracda satılmışdı. Budəfəki hərracda paltar şəxsi kolleksiyadan təqdim olunur.
Xatırladılır ki, Edelşteyn 1982-1993-cü illərdə Diana üçün geyimlər hazırlayıb. Ekspertlər hərraca çıxarılan paltarı 80-120 min dollar dəyərində qiymətləndirirlər. Hərrac yanvarın 23-də keçiriləcək.
Diana 1981-1996-cı illərdə Britaniya taxt-tacının varisi Şahzadə Çarlzın (indiki Böyük Britaniya kralı III Çarlz) həyat yoldaşı olub. O, xeyriyyə tədbirlərinin “kraliçası”, moda dünyasının simvolu sayılırdı, bundan əlavə, Diana kral ailəsinə xas olmayan davranışı ilə bütün dünyanı fəth etmişdi. Britaniyanın BBC yayım korporasiyası tərəfindən 2002-ci ildə keçirilən ümummilli sorğuda Şahzadə Diana bütün zamanların 100 ən böyük britaniyalısı siyahısında üçüncü yeri tutmuşdu.
Şahzadə 1997-ci il avqustun 31-də Alma körpüsünün altındakı Paris tunelində avtomobil qəzası nəticəsində həlak olub. Diananın olduğu “Mercedes” onu izləyən fotoqraflardan aralanmağa çalışarkən yüksək sürətlə tunelin divarına, daha sonra nəqliyyat axınını ayıran sütuna çırpılıb və aşıb. Şahzadənin mühafizəçisi ağır qəzadan sağ çıxan yeganə şəxs olub. Diana, onun sevgilisi Dodi al-Fayed və avtomobilin sürücüsü həyatını itirib(azərtac).
