Avropada qaz qiymətlərinin kəskin şəkildə düşməsi enerji nəhəngi Shell-in bu ilin ikinci rübündə mənfəətini təxminən üçdə bir azaldıb.
AzPost xəbər verir ki, şirkət bu dövrdə 4,26 milyard dollar xalis gəlir əldə etsə də, bu, ötən illə müqayisədə ciddi azalmadır.
Qaz qiymətlərindəki eniş, əsasən İran və İsrail arasında əldə olunan atəşkəsə bağlı olaraq Hörmüz boğazı üzərindən qaz nəqlinin təhlükəsizliyinə dair narahatlıqların azalması ilə izah olunur. Aprel-iyun ayları arasında Avropada qazın qiyməti təxminən 20 faiz ucuzlaşıb.
Bununla belə, Shell-in mənfəəti London maliyyə dairələrinin gözləntilərindən daha yüksək olub. Analitiklər mənfəətin 3,7 milyard dollara düşəcəyini proqnozlaşdırsa da, nəticə 4,26 milyard dollar təşkil edib. Bu da şirkətə 3,5 milyard dollarlıq səhmlərin geri alınması proqramını davam etdirməyə imkan verib.
Shell mənfəətin azalmasını ticarət marjlarının və qaz-yanacaq qiymətlərinin enməsi ilə izah edib. Brent markalı neftin bir barelinin qiyməti 68 dollardan aşağı düşüb, bu da ötən ilki 86 dollarla müqayisədə ciddi geriləmədir.
Shell-in baş icraçı direktoru Vael Sawan bildirib ki, şirkət “daha əlverişsiz makroiqtisadi şəraitə baxmayaraq” güclü əməliyyat göstəriciləri əldə edib. Onun sözlərinə görə, qaz qiymətlərindəki dəyişikliklər əsas təchizat-tələb balansı ilə bağlı deyil, qeyri-fundamental, kağız bazarlarında baş verən volatillik səbəbindən yaşanıb.
Qaz qiymətlərinin aşağı düşməsi, Shell üçün çətinlik yaratsa da, Avropa ölkələrində, xüsusilə Birləşmiş Krallıqda əhali üçün enerji xərclərini azaltmağa səbəb olub. İyul ayından etibarən Britaniyada hökumətin enerji qiymət tavanı 7 faiz endirilib və bu səviyyənin yaxın aylarda da dəyişməyəcəyi gözlənilir.
Shell-in açıqlamaları enerji bazarlarında qeyri-sabitliyin daha çox siyasi və qlobal gərginliklərdən qaynaqlandığını göstərir.
