Türkiyənin ən böyük neft emalı zavodları oktyabr ayında ABŞ-ın Rusiyaya qarşı sanksiyalar tətbiq etməsindən sonra İraq, Qazaxıstan və digər ölkələrdən neft alışını artırır.
AzPost bildirir ki, bu barədə Reuters agentliyi məsələ ilə tanış olan iki mənbəyə istinadən məlumat yayıb.
Mənbələrin məlumatına görə, Türkiyənin ən böyük neft emalı zavodlarından biri olan STAR ( SOCAR-a məxsusdur) bu yaxınlarda İraq, Qazaxıstan və digər istehsalçılardan dekabr ayı üçün dörd partiya neft alıb.
Reuters agentliyinin hesablamalarına görə, bu, gündə 77.000 ilə 129.000 barel arasındadır.
İki mənbəyə görə, dörd göndərişdən biri Qazaxıstandan KEBCO xam nefti olub. STAR ötən il bu xam neft növünü almayıb. Lakin Kpler-in məlumatına görə, oktyabr və sentyabr aylarında STAR-ın tədarükünün demək olar ki, hamısını – təxminən 210.000 barel/gün Rusiya nefti təşkil edib
Mənbələr agentliyə bildirib ki, Türkiyədə iki böyük neft emalı zavoduna sahib olan Tupras, İraq nefti də daxil olmaqla, digər ölkələrdən Rusiya Urals neftinə bənzər xam neft növlərinin alışını artırır. Onlar əlavə ediblər ki, Tupras Avropaya yanacaq ixracını davam etdirmək və Aİ sanksiyalarından yayınmaq üçün tezliklə öz neft emalı zavodlarından birinə Rusiya neftinin tədarükünü tamamilə dayandıra bilər.
Türkiyə Hindistan və Çinlə birlikdə Rusiya neftinin əsas alıcılarından biridir. Kpler-in məlumatlarına görə, Türkiyə yanvar-oktyabr ayları arasında gündə təxminən 669.000 barel neft idxal edib ki, bunun da 317.000 bareli (47%) Rusiyadan gəlib.
22 oktyabrda ABŞ Maliyyə Nazirliyi Rosneft və Lukoil şirkətlərinə və onların 34 törəmə şirkətinə qarşı sanksiyalar elan edərək, onların ABŞ-dakı aktivlərini bloklayıb. Maliyyə Nazirliyi bildirib ki, bu addımlar Rusiyanın Ukraynadakı “sülh prosesinə ciddi maraq göstərməməsi” səbəbindən atılıb.
