Almaniya kansleri Olaf Şolts müdafiə naziri Kristin Lambrextin istefasını qəbul edib.
Azpost.info xəbər verir ki, bu barədə Almaniya Nazirlər Kabineti məlumat yayıb.
57 yaşlı Lambrext bu gün istefa ərizəsi ilə kansler Olaf Şoltsa müraciət eidb. O bildirib ki, mediada davam edən tənqidlər onun nazir kimi fəaliyyətini davam etdirməsini qeyri-mümkün edir.
Tənqidçilər və müxalifətdəki xristian demokratlar onu səriştəsizlikdə, Bundesverin yenidən təchizi prosesində lənglikdə və ictimai çıxışlarda uğursuzluqda ittiham edirdilər.
Keçmiş kansler Angela Merkelin kabinetində ədliyyə naziri, eyni zamanda Ailə, Qadın və Gənclər naziri vəzifəsində çalışan Kristin Lambrext müdafiə naziri postuna 2021-ci ilin dekabrında gətirilmişdi.
“Spiegel” jurnalı yazıb ki, müdafiə naziri vəzifəsinə mümkün namizədlər arasında Almaniya Federal Kanslerinin departament rəhbəri Volfqanq Şmidt və Almaniya Sosial Demokrat Partiyasının həmsədri Lars Klinqbeyl də var.
Azpost.info
