Çin lideri Si Cinpin Pekində səfərdə olan Almaniya kansleri Olaf Şoltsla görüşüb.
Azpost.info xəbər verir ki, sərt koronavirus məhdudiyyətləri fonunda Çin lideri Almaniya kanslerini maskasız qarşılayıb, lakin onun əlini sıxmayıb.
Si Cinpin bildirib ki, Almaniya kansleri Olaf Şoltsun Pekinə səfəri iki ölkə arasında qarşılıqlı anlaşma və qarşılıqlı etimadı gücləndirir: “Mən əminəm ki, səfər iki ölkə arasında qarşılıqlı anlaşma və qarşılıqlı etimadı gücləndirəcək, müxtəlif sahələrdə praktiki əməkdaşlığı dərinləşdirəcək və Çin və Almaniya arasında əlaqələrin gələcək inkişafı üçün planları müəyyənləşdirəcək”.
Çin lideri deyib ki, Çin və Almaniya əsas nüfuzlu ölkələr kimi dünyada sülh naminə dəyişikliklər və təlatümlər zamanı daha çox birlikdə çalışmalıdırlar.
O, həmçinin qeyd edib ki, Şolts Çin Kommunist Partiyasının 20-ci qurultayından sonra Çinə gələn ilk Avropa lideridir. Bundan başqa, bu, kanslerin vəzifəyə gəldikdən sonra bu ölkəyə ilk səfəridir.
Səfər öncəsi Şolt bildirmişdi ki, Almaniya “vahid Çin” mövqeyinə sadiqdir və Tayvanla bağlı status-kvonun dəyişdirilməsi yalnız sülh yolu ilə mümkündür.
Kansler onu da qeyd etmişdi ki, Çin 10 il əvvəlki kimi deyil və ölkə dəyişibsə, Almaniyanın da onunla bağlı mövqeyi dəyişməlidir.
Azpost.info
