“Sülhün qarantı yalnız Azərbaycan və Türkiyə ola bilər” –

Deputat Cavanşir Feyziyev
19 İyul 2021 - 12:56
“Avropa İttifaqı ilə sıx təmasda olduğumuz son 30 ilin təcrübəsi göstərir ki, Aİ- ı adından elan olunan və irəli sürülən təklif və təşəbbüslər heç də Aİ- nın bütün üzv dövlətləri tərəfindən dəstəklənmir. Bir çox hallarda isə ayrı-ayrı Aİ dövlətləri İttifaq səviyyəsində qəbul olunan qərarları sabotaj etməkdən belə çəkinmirlər. Azərbaycana və Türkiyəyə qarşı münasibətdə isə şimali Avropa ölkələri, o cümlədən Fransa və Almaniya xüsusilə qərəzli və qeyri-obyektiv davranışlar sərgiləyir. Bunu həm 30 illik işğal zamanı, həm Vətən müharibəsinin gedişində və həm də post- müharibə dövründə gördük”.
Azpost.info bildirir ki, bu sözləri Milli Məclisin deputatı, Avropa İttifaqı-Azərbaycan Parlament Əməkdaşlıq Komitəsinin həmsədri Cavanşir Feyziyev Şarl Mişelin Azərbaycana səfərini şərh edərkən deyib.
“Nəticə ondan ibarətdir ki, Avropa İttifaqı nə qədər ümumbəşəri dəyərlərdən danışsa da onun real siyasəti bu dəyərlərə əsaslanmır və Avropanın guya bölgəmizdə sülh yaratmaq istəyinə etibar etmək və bunun bizim üçün zərərsiz olacağına inanmaq sadəlövhlük olardı. Avropa üçün ən böyük dəyər özünə lazım olan siyasi və iqtisadi dividendləri əldə etməklə həm də xristian həmrəyliyinə sadiq qalmaqdır”-deyə deputat vurğulayıb.
C.Feyziyevin sözlərinə görə, məsələyə tərəfsiz və obyektiv baxış onu göstərir ki, Cənubi Qafqazda sülhün qarantı yalnız Azərbaycan və Türkiyə ola bilər: “Türkiyədən başqa bütün digər beynəlxalq və regional güc mərkəzlərinin izlədiyi “xristian həmrəyliyi” siyasəti onların obyektiv və qərəzsiz yanaşmasına mane olur. Belə bir şəraitdə bütün dünya ilə əlaqələrimizi lazımi ölçülərdə tənzimıəməklə bərabər Türkiyə və digər türkdilli dövlətlərlə münasibətlərin daha da sıxlaşdırılması və daha yüksək siyasi və iqtisadi səviyyəyə qaldırılması ilə Azərbaycan bütövlükdə bölgənin daimi söz sahibi ola bilər və inanıram ki, belə də olacaq”.
Bununla yanaşı deputat Avropa İttifaqı Şurasının Prezidenti Şarl Mişelin “Avropa İttifaqı Cənubi Qafqazda sülhün bərqərar olunmasında maraqlıdır” bəyanatını konstruktiv adlandırıb.