Tanınmış jurnalist Hikmət Sabiroğlu və qardaşı 28 ildən sonra Şuşada –

FOTO
12 Sentyabr 2021 - 16:10

Tanınmış şuşalı jurnalist Hikmət Sabiroğlu və qardaşı, “Yeni Müsavat” qəzetinin redaktoru Nazim Sabiroğlu Şuşadadırlar.

Hikmət Sabiroğlu bir gün əvvəl Şuşaya gedib, uzun illərin ayrılığından sonra gecəni doğma şəhərində keçirib. Nazim Sabiroğlu isə bu gün Şuşa Qoruq İdarəsinin təşkilatçılığı ilə gerçəkləşən səfər çərçivəsində bu şəhərə yollanıb. Qardaşlar ata yurduna baş çəkəcəklər.

Səfər təşkilatçılarına təşəkkür edən Nazim Sabiroğlu Musavat.com-a bildirib ki, uzun illər sonra doğma şəhərində olmaq izahedilməz hissdir:

“Əminəm ki, bu gün Şuşada olanlar hamısı bu hissləri yaşayır. Şuşasız Azərbaycan tam ola bilməzdi. Şuşa həm də Azərbaycanın birlik rəmzi, tamlıq simvoludur. Biz Şuşasız mənəvi sıxıntılar içərisində, belibükük idik. 2020-ci ilin 8 noyabrında Azərbaycan Ordusu təkcə tarixi şəhərimizi deyil, həm də xalqımızın qürurunu özünə qaytardı, belimizi dikəltdi. Şəhidlər bizim baş tacımızdır. İnanıram ki, dövlətimiz Şuşada şəhidlərin xatirəsini əbədiləşdirəcək, möhtəşəm abidə ucaldacaq. O abidəsiz Şuşa yarımçıq olar…”

O qeyd edib ki, Şuşaya gəlməkdə əsas məqsədi 28 illik ayrılıqdan sonra atasının qəbrini ziyarət etməkdir: “Alçaq düşmən qəbiristanlığımızı xaraba qoyub, baş daşlarını oğurlayıb, sındırıb. İki gündür ki, Hikmət atamın qəbrini axtarır… Bu səbəbdən sevinc içində böyük bir məyusluq yaşayırıq…”