Putinin ABŞ prezidentinə Rusiya tarixi haqqında uzun mühazirə oxumasından sonra Tramp Alyaskada Rusiya nümayəndə heyəti ilə şam yeməyindən imtina edib.
AzPost bildirir ki, bu barədə Financial Times nəşri yazır.
Yazıda iddia olunur ki, Rusiya və ABŞ prezidentlərinin Alyaskada təkbətək görüşü zamanı Vladimir Putin Donald Trampa Rusiyanın və Rusiya İmperiyasının tarixindən danışmağa başlayıb. Bu, Ağ Ev rəhbərinin dəfələrlə səsini ucaltmasına və hətta bir anda onu tərk etməklə hədələməsinə səbəb olub.
“Nəhayət, Tramp görüşü yarımçıq kəsdi və planlaşdırılan naharı ləğv etdi”, – Financial Times yazır.
Qəzet bununla bağlı səkkiz qərb və ukraynalı rəsmisinə və diplomata, həmçinin sülh danışıqlarına yaxın olan bir neçə rus mənbəsinə istinad edir.
Nəşrin yazdığına görə, Putin Trampa Ukrayna və Rusiyanın bir millət olması barədə geniş danışıb, xüsusilə Ryurik və Yaroslav Müdrıy, eləcə də 17-ci əsrdə Sol Sahil Ukraynasının Rusiya İmperiyası ilə birləşməsinə şərait yaradan kazak atamanı Boqdan Xmelnitskinin dövründən bəhs edib.
Bu görüş zamanı siyasətçilər sadəcə tarixi deyil, başqa müzakirə aparıblar: “Donald Tramp müharibəni bitirəcəyi təqdirdə Vladimir Putinə çox yaxşı təklif edib, lakin Rusiya prezidenti bütün “hədləri aşıb”-deyə, Ukraynanın keçmiş baş naziri Arseni Yasenyuk FT-yə deyib.
Nəşrin məlumatına görə, Tramp Alyaskada Putinə ABŞ sanksiyalarının yumşaldılmasını, ilhaq edilmiş Krımın Rusiya ərazisi kimi tanınmasını və Ukraynada atəşkəs müqabilində Kiyevi Donbasdakı qoşunların təmas xəttindən çıxarmağa inandırmağı təklif edib.
Bununla belə, Rusiya prezidenti israr edib ki, Rusiya yalnız Ukrayna təslim olub Donbasda daha çox ərazini verərsə və Kiyevdə siyasi rəhbərlik dəyişərsə, müharibəni dayandırmağa hazır olacaq.
