“Reuters” ABŞ prezidenti Donald Trampın Rusiyaya qarşı vəd etdiyi ikinci dərəcəli sanksiyaların tətbiqinin mümkün nəticələrini təhlil edib.
AzPost bildirir ki, agentliyin təhlilçisinin fikrincə, bu tədbirlər Rusiya neftinin ixracına həqiqətən ciddi zərbə ola bilər. Lakin neft treyderləri hələ ki, Ağ Ev rəhbərinin öz hədələrini reallaşdıracağına inanmırlar.
Agentlik xatırladır ki, son illərdə neft gəlirləri Rusiyanın federal büdcəsinin 30%-dən 50%-ə qədərini təşkil edir və Kremlin əsas maliyyə mənbəyidir. Rusiya neftinin əsas alıcıları Çin, Hindistan və Türkiyədir.
İndi Qərb ölkələri Rusiya nefti üçün qiymət həddini 60 dollar səviyyəsində müəyyən ediblər. Lakin Moskva bu məhdudiyyətlərdən, o cümlədən “kölgə donanmasının” köməyi ilə uğurla yan keçməyi öyrənib.
Nəşr qeyd edir ki, əgər Tramp administrasiyası Rusiya ilə ticarət edən ölkələrə 100% ikinci dərəcəli rüsum tətbiq etsə, bu, mövcud sanksiyalar rejimindən yan keçmək imkanlarının qarşısını alacaq. Nəticədə Rusiyanın neft gəlirlərini kökündən azalda bilər.
“Ancaq neft treyderləri buna inanmırlar. Trampın bəyanatlarından sonra neftin qiymətləri faktiki olaraq bir dollardan çox ucuzlaşıb. Bu, investorların Trampın əslində onun təhdidinə əməl edəcəyinə dair qeyri-müəyyənliyini nümayiş etdirir”, – nəşr yazır.
Buna səbəb Rusiya neftinin ixracına qarşı effektiv ikinci dərəcəli sanksiyaların böyük ehtimalla qlobal enerji bazarında qiymətlərin kəskin artmasına gətirib çıxaracağıdır.
Reuters qeyd edir ki, bu, qlobal inflyasiya təzyiqlərini artıracaq və nəticədə Amerika istehlakçılarına zərər verəcək. Tramp isə bunu etmək istəmir.
“Əslində, investorlar hesab edirlər ki, Trampın təhdidləri nə qədər ifrat olarsa, onların reallaşma ehtimalı bir o qədər azdır”- deyə agentlik yekunlaşdırır.
Donald Tramp bazar ertəsi bildirib ki, Rusiya Ukraynada 50 gün ərzində sülh sazişi ilə razılaşmasa, ona qarşı ikinci dərəcəli sanksiyalar tətbiq edəcək.
