Rusiya Xarici İşlər Nazirliyi BMT-nin “taxıl sazişi” çərçivəsində gəmilərin yoxlanılmasını gecikdirmək ittihamlarını rədd edib.
Azpost.info xəbər verir ki, Rusiya XİN-ə görə, bu, faktların manipulyasiyası və təhrifidir. Bu səbədən də Moskva real məlumatları və əməliyyatın həyata keçirilməsi ilə bağlı qiymətləndirmələri təqdim etməyə məcburdur.
“Türkiyənin ərazi sularında 100-dən çox gəminin olduğu iddia edilən, eləcə də orta gözləmə müddəti 21 gün olan məlumatları təsdiq etmirik. Hazırda Ukrayna limanlarında və yoxlama zonalarında 64 gəmi dayanıb. Onların yoxlanılması və keçidi üçün prioritetlərin siyahısını Ukrayna tərəfi formalaşdırır, Rusiya nümayəndələri buna heç bir şəkildə təsir göstərmirlər”, – Rusiya XİN bildirib.
XİN əlavə edib ki, Moskva dəfələrlə İstanbul limanında yükdaşıyanların süni şəkildə yığılması probleminə diqqət çəkib. Bu problem də gəmiləri icarəyə götürən ukraynalı tacirlər tərəfindən yaradılır: “Kiyev yalnız eqoist məqsədləri rəhbər tutub daha çox və daha tez satmağa çalışır, təsdiq edilmiş iş qaydasına məhəl qoymur”.
“Ukrayna məhsullarının alıcılarının real coğrafiyası BMT-nin təqdim etdiyindən fərqlidir. Əslində, bunun böyük hissəsini yüksək gəlirli ölkələr (Böyük Britaniya, Çin, İordaniya və s.), üçdə birini Banqladeş, Hindistan, Pakistan da daxil olmaqla, orta gəliri aşağı olan ölkələr alır. Ehtiyacı olan ölkələrin – Əfqanıstan, Yəmən, Somali və digərlərinin payına cəmi 3 faiz düşür”, – məlumatda deyilir.
Azpost.info
