Ukrayna Silahlı Qüvvələri iyulun 30-na keçən gecə Rusiyanın Krasnodar diyarında yerləşən və ölkənin cənubundakı ən böyük limanlardan biri hesab edilən Taman dəniz limanına zərbə endirib.
Azpost.info bildirir ki, bu barədə Rusiyanın Nəqliyyat Prokurorluğu məlumat yayıb.
Məlumata görə, hücum nəticəsində liman infrastrukturuna ziyan dəyib, həmçinin xəsarət alanlar var.
Kuban Operativ Qərargahı bildirib ki, Temryuk rayonunun Volna qəsəbəsində yerləşən müəssisənin ərazisinə pilotsuz uçuş aparatının qalıqlarının düşməsi nəticəsində yanğın baş verib. Həmin ərazidə Taman limanının neft məhsulları və quru yük terminalları yerləşir.
İlkin məlumata görə, hadisə nəticəsində 4 nəfər xəsarət alıb, onlardan 3-ü xəstəxanaya yerləşdirilib.
NASA-nın FIRMS peyk monitorinq sistemi Taman limanında, həmçinin “Tamannefteqaz” dəniz neft terminalında yanğınların baş verdiyini qeydə alıb. İllik ötürmə gücü təxminən 20 milyon ton olan bu terminal OTEKO şirkətlər qrupu tərəfindən idarə olunur.
Bundan başqa, bitki yağları istehsal edən və ixrac edən EFKO Qida İnqrediyentləri şirkətinin obyektlərində də yanğın baş verdiyi bildirilir.
Reuters agentliyinin mənbələri EFKO-nun bitki yağlarının yüklənməsi terminalına zərbə endirildiyini təsdiqləyiblər. Məlumata görə, illik gücü 5,5 milyon ton olan Taman Taxıl Terminal Kompleksi də zədələnib.
Qeyd edək ki, Taman limanı Kerç boğazının donmayan akvatoriyasında yerləşən və Rusiyanın cənubunda əsas nəqliyyat-logistika mərkəzlərindən biri hesab olunur. Liman vasitəsilə neft məhsulları, mayeləşdirilmiş qaz, kömür, kükürd, taxıl, bitki yağları və mineral gübrələr ixrac edilir.
İllik yük dövriyyəsi 90 milyon tondan çox olan Taman limanı yükdaşıma həcminə görə Azov-Qara dəniz hövzəsində Novorossiysk limanından sonra ikinci yerdə qərarlaşır.
