Ukrayna ordusu Xerson vilayəti ilə Krım sərhədində yerləşən Çonqarski körpüsünə zərbə endirib.
Azpost.info bildirir ki, bu barədə Rusiyanın Xersona rəhbər təyin etdiyi Saldo telegram kanalında yazıb.
Xerson və Krım hakimiyyət orqanları Çonqar kəndi yaxınlığındakı rayonlar arasında olan körpünün zədələndiyini bildirib: “Körpüdən avtomobillərin keçidi yaxın vaxtlarda bərpa olunacaq. Xerson vilayəti ilə Krım arasında ehtiyat marşrut üzrə nəqliyyat vasitələrinin hərəkəti müvəqqəti təşkil edilib”, – deyə Saldo Telegram-da yazıb.
O bildirib ki, itki yoxdur. Saldonun ilkin məlumatına görə, hücumda Britaniya istehsalı olan uzaqmənzilli “Storm Shadow” raketlərindən istifadə edilib.
Krımın rəhbəri Sergey Aksyonov hücum nəticəsində xəsarət alan olmadığını təsdiqləyib. “Hazırda partlayıcı maddələr üzrə ekspertlər sursatın növünü qiymətləndirmək üçün ekspertiza aparırlar. İxtisaslaşdırılmış xidmətlər yolun hərəkət hissəsini yoxlamağa başlayıb”, – o, Telegram-da yazıb.
Azpost.info
