Ukrayna ilə bağlı münaqişəni törədən ABŞ bu ölkənin bərpası üçün pulu özü ödəməlidir.
Azpost.info bildirir ki, bu sözləri Rusiyanın Vaşinqtondakı səfiri Anatoli Antonov bildirib.
“Ukraynada baş verənlərə görə ABŞ administrasiyası məsuliyyət daşıyır. Buna görə də ölkəni ABŞ bərpa etməlidir”, – Antonov geniş şərhində bildirib.
Diplomat qeyd edib ki, Ukrayna münaqişəsi ABŞ-ın Rusiya sərhədləri yaxınlığında gərginlik ocağı yaratmaq, Ukraynanı “anti-Rusiya”ya çevirmək üçün apardığı uzunmüddətli və məqsədyönlü səylərinin nəticəsidir.
O vurğulayıb ki, hazırda Birləşmiş Ştatlar qarşıdurmanı qızışdırır, respublikanı güclü silahlarla doldurur və istənilən dinc təşəbbüslərini beşiyindəcə boğur.
“Amerika silahlarının əli ilə dağıdılan evlərin pulunu ödəmək mümkün ola bilər, amma Vaşinqton günahsız insanların həyatının bahasını necə ödəyəcək? ABŞ bugünkü əks-hücum adlandırılan prosesdə ağına-bozuna baxmadan hücuma göndərdiyi ukraynalılarla necə hesablaşacaq? – deyə Antonov vurğulayıb.
Onun sözlərinə görə, Kiyev üçün silah alınması üçün ayrılan görünməmiş məbləğdə vəsaitin fonunda Afrika, Latın Amerikası və Asiyanın ən kasıb dövlətləri diqqətdən kənarda qalıb.
“Planetdə insanların acından öldüyü yerlər var. ABŞ münaqişəyə Qərbin faktiki cəlb olunması səbəbindən qan tökülməsini uzatmağı və üçüncü dünya müharibəsinƏ təhrik etməyi daha aktual hesab edir”.
Azpost.info
