“Ukrayna parlamentindəki hakim “Xalqın xidmətçisi”partiyasının fraksiya rəhbəri David Araxamiyanın Ukrayna ilə münasibətlərin normallaşdırılması üçün Gürcüstana irəli sürdüyü tələblər təəssüf doğurur”.
Azpost.info-nun məlumatına görə, bunu Gürcüstanın Baş naziri İrakli Kobaxidze bəyan edib.
Kobaxidze bildirib ki, Ukrayna parlamentinin nümayəndəsinin Gürcüstana belə münasibət göstərməsi çox təəssüfedici və kədərlidir. O əlavə edib ki, Ukrayna bu gün çətin vəziyyətdədir, gürcülər Ukrayna xalqına hörmət edirlər, ona görə də onlar Araxamiya və ya digər siyasətçilərlə mübahisəyə girmək fikrində deyillər.
Baş nazir vurğulayıb ki, Gürcüstan hakimiyyəti Ukrayna ilə həmrəyliyini təkcə sözlə deyil, həm də konkret hərəkətlərlə ifadə edib. Nümunə kimi o, humanitar yardımın çatdırılmasını və Gürcüstanın dəstəklədiyi 600-dən çox qətnamə və digər sənədləri göstərib.
Kobaxidze Ukraynanın öz səfirini Gürcüstandan geri çağırmasını “anlaşılmaz” adlandırıb. Onun sözlərinə görə, o zaman bəhanə ölmək üzrə olan Saakaşvili idi, lakin bu gün bu “bəraət” işləmir.
Gürcüstanın Rusiya ilə münasibətlərinə gəlincə, Baş nazir deyib ki, Tbilisi “praqmatik siyasət”ə sadiq qalmağa davam edəcək: “Bu siyasətin məqsədi sülhü və strateji siyasi maraqlarımızı qorumaqdır”.
