Rusiyanın populyar estrada müğənnisi Valeri Meladzeni Ukrayna ilə bağlı mövqeyinə görə “küncə sıxırlar”. Sevilən ulduzun daha bir konserti baş tutmayacaq.
Azpost.info xəbər verir ki, müğənninin mayın 2-də Krasnoyarskda “Grand Hall Sibir” səhnəsində keçirilməli olan konsert ləğv edilib.
Bundan əvvəl onun İrkutskdakı “Trud” İdman Sarayındakı yaz konserti ləğv edilmişdi.
Yanvarın əvvəlində internetdə Meladze ilə bağlı qalmaqallı görüntü yayılmışdı. Orada müğənni bir pərəstişkarının xahişi ilə Ukrayna ilə bağlı şüara pıçıltı ilə cavab vermişdi. Meladze mikrofonu kənara qoyduğu üçün cavabı eşidilməmiş, lakin fanatın müğənniyə razılıq etdiyi və onu təriflədiyi hissə videoya düşmüşdü. Qalmaqaldan sonra müğənni sosial şəbəkələrdə heç kimə nifrət etmədiyini və nifrət edə bilməyəcəyini bəyan etmişdi.
Daha sonra Rusiya Dumasının Təhlükəsizlik və Korrupsiyaya Qarşı Mübarizə Komitəsi rəhbərinin birinci müavini Andrey Luqovoy Rusiya Baş prokuroru İqor Krasnova Meladzenin əməllərinə hüquqi qiymət verilməsi xahişi ilə müraciət göndərdi. Müraciətdə bildirilirdi ki, sənətçi millətçi şüarlarla Ukraynanı tərənnüm, Rusiya rəhbərliyini isə tənqid edib.
Azpost.info
