UNICEF Tayland ilə Kamboca sərhədində artan gərginliklə bağlı dərin narahatlığını ifadə edib. BMT-nin Uşaq Fondu bildirib ki, qarşıdurmalar nəticəsində mülki əhali arasında, o cümlədən uşaqlar arasında itkilər qeydə alınıb, yüzlərlə məktəb isə müvəqqəti bağlanıb.
AzPost xəbər verir ki, qurumun yaydığı rəsmi bəyanatda deyilir: “UNICEF Tayland–Kamboca sərhədində baş verən zorakılığın artmasından ciddi şəkildə narahatdır. Məlumatlara görə, münaqişə nəticəsində uşaqlar da daxil olmaqla, mülki şəxslər həlak olub və yüzlərlə məktəb fəaliyyətini dayandırıb.”
UNICEF münaqişədə iştirak edən bütün tərəflərə beynəlxalq hüquq və Uşaq Hüquqları Konvensiyasına uyğun şəkildə maksimum təmkin nümayiş etdirməyə çağırıb. Qurumun açıqlamasında vurğulanır ki, uşaqların qorunması və rifahı prioritet olmalı, məktəblər isə təhlükəsiz təhsil məkanları kimi saxlanılmalıdır.
UNICEF bildirir ki, uşaqların fiziki təhlükəsizliyi ilə yanaşı, onların təhsilə çıxışı və psixoloji rifahı da bu cür qarşıdurmalardan ciddi zərər görə bilər. Qurum bütün tərəfləri hərbi əməliyyatlar zamanı uşaqlara və mülki infrastruktura zərər vurmamağa çağırıb.
