Ümumdünya Səhiyyə Təşkilatının (ÜST) baş direktoru Tedros Adhanom Qebreyesus, yeni bir pandemiyanın qaçılmaz olduğunu və sadəcə nəzəri riskdən daha çox “epidemioloji müəyyənliyi” təmsil etdiyini söyləyib.
AzPost xəbər verir ki, pandemiyanın qarşısının alınmasına dair sazişin layihəsini hazırlayan Hökumətlərarası Danışıqlar Orqanının (INB) 13-cü sessiyasının açılışında çıxış edən o, COVID-19-un yaratdığı ağır nəticələri xatırladıb və “növbəti pandemiyanın gözlənməyəcəyini” vurğulayıb. Qebreyesus bunun “20 ildən sonra, hətta sabah da” gələ biləcəyini qeyd edərək, bu hadisəyə hazırlıq görməyə çağırıb.
O qeyd edib ki, rəsmi məlumatlara görə, COVID-19-dan 7 milyon insan ölüb, lakin qurbanların real sayı 20 milyona çata bilər. Bundan əlavə, pandemiya qlobal iqtisadiyyata 10 trilyon dollardan çox ziyan vurub.
Qebreyesus pandemiya sazişi üzrə danışıqlar zamanı razılığın əldə olunacağına ümid etdiyini bildirib və belə bir razılaşmanın ÜST-yə üzv ölkələrin “suverenliyinə xələl gətirməyəcəyinə”, əksinə, onların milli maraqlarını və beynəlxalq səylərini gücləndirəcəyinə əmin olduğunu bildirib.
Xatırladaq ki, 27 may – 1 iyun 2024-cü il tarixlərində Cenevrədə keçirilən 77-ci Ümumdünya Səhiyyə Assambleyası bu sazişi inkişaf etdirmək üçün 2021-ci ildə yaradılmış IHPO-nun mandatını yenilədi. İşin nəticələrinin 2025-ci ilin mayında keçiriləcək 78-ci Assambleyada təqdim olunması gözlənilir.
Qebreyesus həmçinin qeyd edib ki, ölkələrin suverenliyinin mümkün pozulması ilə bağlı dezinformasiyanın yayılması müqavilənin işlənib hazırlanmasında irəliləyişə mane olur.
