“Xarici investorlar gəlməsə, gələn il Rusiyada pul olmayacaq”.
Azpost.info xəbər verir ki, bunu rusiyalı milyarder Oleq Deripaska Krasnoyarsk İqtisadi Forumunda çıxışı zamanı bildirib.
“Artıq pulla bağlı ciddi problemlər var. Dost ölkələrdən xarici investorları cəlb etmək çox vacibdir. Əgər biz problemlərə görə hər rüb oyun qaydalarını dəyişsək, heç kim bizə inanmayacaq – nə rusiyalı, nə də xarici sahibkarlar”, – milyarder vurğulayıb.
Onun fikrincə, ölkədəki iqtisadi vəziyyət çox çətin və qeyri-müəyyəndir və ən azı 2025-ci ilin ortalarına qədər belə qalacaq.
Həmçinin çıxışı zamanı Deripaska məmurların və hüquq-mühafizə orqanlarının nümayəndələrinin sayının iki-üç dəfə ixtisar edilməsini təklif edib, onların hazırkı sayını iqtisadiyyata ciddi yük adlandırıb.
“Baza” Telegram kanalı xəbər verir ki, Deripaskanın çıxışı zamanı onun yanında əyləşən Krasnoyarsk diyarının qubernatoru Aleksandr Uss ixtisara düşməyə hazır olduğunu deyib. Eyni zamanda o, milyarderə açıq auditoriyada incə məsələləri müzakirə etməməyi təklif edib.
Oleq Deripaska Rusiya Alüminium şirkətinin keçmiş rəhbəri, “Basic Element” şirkətinin müşahidə şurasının sədridir. Vladimir Putinə yaxın şəxs kimi 2018-ci ilin aprelindən ABŞ-ın sanksiyaları altındadır. Rusiyanın Ukrayna ərazisinə genişmiqyaslı müdaxiləsindən sonra Deripaska da Avropa İttifaqı, Böyük Britaniya və bir sıra digər ölkələrin sanksiyalarına məruz qalıb. Bununla bağlı milyarder 2017-ci ildə Kipr vətəndaşlığından məhrum edilib.
2021-ci ilin sentyabrında hazırda həbsdə olan rusiyalı siyasətçi Aleksey Navalnının komandası Rusiya xarici işlər naziri Sergey Lavrovun qohumlarının Oleq Deripaskaya məxsus şəxsi təyyarələrdən, evlərdən və otellərdən istifadə etməsi ilə bağlı araşdırma dərc edib. İddialara görə, bunun müqabilində Lavrov sahibkarın maraqlarını lobbiləşdirir.
Üç il əvvəl Navalnı Deripaskanın Rusiya Baş nazirinin o vaxtkı müavini Sergey Prixodko ilə yaxtada necə istirahət etdiyi ilə bağlı araşdırma yaymışdı.
Azpost.info
