Xiyar
Xiyar süfrəmizdə ən çox istifadə olunan tərəvəzlərdən biridir. Təravətli dadı və xırtıldayan quruluşu ilə sevilən bu tərəvəz eyni zamanda orqanizm üçün bir sıra faydalı maddələr ehtiva edir.
“Martha Stewart” nəşrinin məlumatına görə, xiyarın əsas üstünlüklərindən biri yüksək su tərkibidir.
1. Orqanizmi nəmləndirir
ABŞ Kənd Təsərrüfatı Departamentinin (USDA) məlumatlarına görə, xiyarın təxminən 96 faizi sudur.
Bu səbəbdən xiyar xüsusilə isti havalarda və gün ərzində kifayət qədər maye qəbul etmək baxımından rasiona əlavə edilə biləcək məhsullardan biridir. Tərkibindəki bəzi minerallar da orqanizmin su-duz balansının qorunmasına kömək edir.
2. Sümüklər üçün vacib vitamin ehtiva edir
Xiyar K vitamini mənbələrindən biridir. Bir xiyarda təxminən 50 mikroqram K vitamini ola bilər.
K vitamini qanın laxtalanması və sümük sağlamlığı üçün vacib rol oynayır. Dietoloqların fikrincə, uzunmüddətli K vitamini çatışmazlığı sümük sağlamlığı ilə bağlı problemlərlə əlaqəli ola bilər.
3. Antioksidantlarla zəngindir
Xiyarın tərkibində C vitamini, beta-karotin və flavonoidlər kimi antioksidant maddələr var.
Bu maddələr hüceyrələri oksidləşdirici stressin yaratdığı zədələnmədən qoruma prosesində rol oynayır.
Xiyarda həmçinin kukurbitasinlər adlı bitki birləşmələri mövcuddur. Bunlar xiyar və digər balqabaqkimilərdə rast gəlinən təbii maddələrdir və onların mümkün bioloji təsirləri elmi araşdırmalarda öyrənilir.
4. Həzm sisteminə kömək edə bilər
Xiyar lif baxımından ən zəngin tərəvəzlərdən deyil. Lakin tərkibindəki su və bitki liflərinin birlikdə qəbulu bağırsaqların normal fəaliyyətinə kömək edə bilər.
Bu xüsusiyyət xiyarın gündəlik rasionda həzm sistemini dəstəkləyən məhsullardan biri olmasına imkan verir.
Xiyarın qabığını soymaq lazımdır?
Dietoloqlar xiyarın qabığı ilə birlikdə yeyilməsinin daha çox qida maddəsi almağa imkan verə biləcəyini bildirirlər.
Qabıqda lif, kalium, A və K vitaminləri kimi bəzi faydalı maddələr daha çox ola bilər.
Lakin qabığın dadı və ya teksturası xoşunuza gəlmirsə, onu soymaq da mümkündür. Bu halda belə xiyarın əsas üstünlüklərindən biri olan yüksək su tərkəzi və digər qida maddələri qalır.
Yəni xiyar sadəcə salat üçün istifadə olunan “sulu tərəvəz” deyil. Onun yüksək su tərkibi, K vitamini, antioksidantları və bitki lifləri gündəlik qidalanmada faydalı seçim ola bilər.
