YAP-ın qurultayının partiyanın qərargahında keçiriləcəyi gözlənilir –

Məhdud sayda olacaq nümayəndələr bu gün testdən keçirilir
03 Mart 2021 - 12:21

Martın 5-nə təyin olunmuş Yeni Azərbaycan Partiyasının (YAP) növbədənkənar qurultayının partiyanın mərkəzi qərargahında keçiriləcəyi gözlənilir.

Azpost.info bildirir ki, bu barədə Etikxeber.az-a adının çəkilməsini istəməyən tanınmış YAP-çılardan biri deyib.

“Ölkədə koronavirus pandemiyası hələ də davam edir. Böyük zallarda qurultayın keçirilməsi heç bir halda ehtimalolunan deyil. Bu baxımdan, mümkündür ki, qurultay elə məhdud sayda iştirakçılarla partiyanın mərkəzi qərargahında keçirilsin. Ancaq təbii ki, bu, mənim şəxsi mülahizələrim, ehtimallarımdır. Qərar bütün hallarda YAP rəhbərliyinindir”-deyə, o, əlavə edib.

Məlumata görə, qurultay iştirakçıları YAP-ın mərkəzi qərargahına dəvət ediliblər və bu gün onlardan COVİD-19-la bağlı analizlər, müayinlər götürüləcək.