Best Countries 2026 reytinqinin müəllifləri insanların həyat üçün ən rahat hesab etdiyi ölkələri müəyyənləşdiriblər. ABŞ-ın Uorton Biznes Məktəbi (Wharton School) tərəfindən hazırlanan araşdırma 33 ölkədən 15 131 nəfərin sorğusuna əsaslanır və müxtəlif ölkələrdə həyat keyfiyyəti ilə bağlı ictimai rəyi əks etdirir.
Azpost.info bildirir ki, bu barədə Naked Science məlumat yayıb.
Reytinq hazırlanarkən təhlükəsizlik, səhiyyə və təhsil sistemi, iqtisadi imkanlar, dövlət xidmətlərinin keyfiyyəti və sosial infrastruktur kimi meyarlar nəzərə alınıb.
Ən yüksək həyat keyfiyyətinə malik ölkələr
2026-cı ilin reytinqində İsveç birinci yeri tutub. Onu Danimarka və Kanada izləyib.
Ümumilikdə ilk 30-luqda yer alan ölkələrin 20-si Avropadandır ki, bu da qitənin yüksək həyat standartlarını bir daha təsdiqləyir. Reytinqə ümumilikdə ÜDM, birbaşa xarici investisiyalar, turizm və insan inkişafı göstəricilərinə görə seçilmiş 85 ölkə daxil edilib. İsveç 100 ballıq etalon kimi götürülüb və digər ölkələrin nəticələri onun göstəricisi ilə müqayisə olunub.
Araşdırmaya görə, reytinqdə ön sıralarda yer alan ölkələri aşağıdakı ümumi xüsusiyyətlər birləşdirir:
səmərəli dövlət institutları;
əlçatan səhiyyə sistemi;
yüksək ictimai təhlükəsizlik;
vətəndaşların bir-birinə və dövlətə yüksək etimadı.
Nəticələr digər nüfuzlu beynəlxalq hesabatlarla da üst-üstə düşür. Belə ki, Finlandiya artıq doqquzuncu ildir ki, Dünya Xoşbəxtlik Hesabatında birinci yeri tutur. Danimarka, Norveç və İsveç isə rifah, sosial etimad və həyat məmnuniyyəti üzrə daim lider ölkələr sırasında yer alır.
Həyat keyfiyyətinin ən aşağı olduğu ölkələr hansıdır?
Reytinqin son pillələrində isə uzunmüddətli müharibələr, zəif dövlət idarəçiliyi və iqtisadi qeyri-sabitliklə üzləşən ölkələr qərarlaşıb. Araşdırmaya görə, Ukrayna siyahıda sonuncu yerdə qərarlaşıb. Ondan əvvəl İran və Livan gəlir. Hesabat müəllifləri hesab edirlər ki, bu ölkələrdə davam edən siyasi və iqtisadi problemlər həyat keyfiyyətinə ciddi mənfi təsir göstərir.
Tədqiqat müəllifləri vurğulayırlar ki, müasir dövrdə təkcə güclü iqtisadiyyat ölkəni yaşamaq üçün ideal məkana çevirmir. Əsas amillər səmərəli idarəetmə, təhlükəsizlik, keyfiyyətli səhiyyə, inkişaf etmiş sosial müdafiə sistemi və cəmiyyətdə yüksək etimad mühitidir.
