Rusiyada elan edilən səfərbərliklə əlaqədar ölkədən İsrailə yəhudilərin kütləvi köçü başlayıb. Onlara kömək etmək üçün yəhudi dövlətinin hökuməti Azərbaycanda və Finlandiyada qaçqınlar üçün düşərgələr yaratmaq qərarına gəlib.
Azpost.info -nun məlumatına görə, İsrail KİV-ləri bildirir ki, ötən bazar İsrail hökuməti Azərbaycan və Finlandiyada yəhudi qaçqınlar üçün düşərgələr yaratmaq, həmçinin Rusiya yəhudilərinin “Qayıdış Qanunu” ilə əhatə olunan repatriasiyası üçün sürətləndirilmiş proseduru dəstəkləmək üçün 90 milyon şekel ayırıb.
Məlumata görə, təkliflər maliyyə naziri Aviqdor Liberman və yəhudilərin inteqrasiya naziri Pnina Tamano-Şata tərəfindən irəli sürülüb.
Rusiyada baş verən məlum hadisələrlə əlaqədar on minlərlə yəhudinin tezliklə İsrail dövlətinə köçəcəyi gözlənilir.
Əvvəllər müharibə fonunda İsrail hökuməti Ukrayna yəhudiləri üçün sürətləndirilmiş repatriasiya qaydaları tətbiq etmişdi. Yəhudi vətəndaşlarının bu ölkədən kütləvi köçü Rusiyanın Ukraynaya müdaxiləsindən dərhal sonra başlayıb.
İsrail hökumətinin məlumatına görə, bu ilin fevralından bu yana ümumilikdə 40 min vətəndaş ölkəyə geri qayıdıb, onlardan 24 mini Rusiyadandır. Beləliklə, söhbət son 20 ildə yəhudilərin ən böyük köçündən gedir.
Bildirilir ki, Azərbaycan və Finlandiyada ukraynalı qaçqınlar üçün Polşa və Rumıniyadakı düşərgələr kimi fəaliyyət göstərəcək müvəqqəti qaçqın düşərgələrinin yaradılması “Soxnut” Yəhudi Agentliyinin əməkdaşları tərəfindən həyata keçirilir.
