Ukrayna
Ukrayna Prezidenti Volodimir Zelenski Ali Radaya (parlament) ölkədə hərbi vəziyyətin və səfərbərlik müddətinin uzadılması haqqında qanun layihələrini təqdim edib.
AZƏRTAC bu barədə Ukrayna Ali Radasının saytına istinadla xəbər verir.
V.Zelenski parlamentə iki qanun layihəsi təqdim edib: Ukrayna Prezidentinin “Ukraynada hərbi vəziyyətin müddətinin uzadılması haqqında” Fərmanının təsdiq edilməsi haqqında” və Ukrayna Prezidentinin “Ümumi səfərbərlik müddətinin uzadılması haqqında” Fərmanın təsdiq edilməsi haqqında”.
Birinci sənədə əsasən, ölkədə hərbi vəziyyətin 90 gün müddətinə uzadılması təklif edilir.
İzahat qeydinə əsasən, ikinci qanun layihəsində ümumi səfərbərliyin 2025-ci il fevralın 8-dən 90 gün müddətinə uzadılması nəzərdə tutulub.
Ukraynada 2022-ci ilin fevralında xüsusi hüquqi rejim – hərbi vəziyyət tətbiq edilib. Bu vəziyyət ölkənin suverenliyinə və ərazi bütövlüyünə təhlükə yaradan hücum təhlükəsi və ya birbaşa silahlı təcavüzlə üzləşdiyi hallarda istifadə olunur.
