Oktyabrın 8-də Azərbaycan Respublikasının Vəkillər Kollegiyası (ARVK) Rəyasət Heyətinin növbəti iclası keçirilib.
Bu barədə kollegiyanın mətbuat xidmətindən məlumat verilib.
Bildirilib ki, iclasda ARVK-nın sədri Anar Bağırov Rəyasət Heyətinin cari fəaliyyəti, görülən işlər və qarşıda duran vəzifələr barədə ətraflı məlumat verib.
Sonra iclasın gündəliyinə uyğun olaraq vəkilliyə qəbulla bağlı məsələyə baxılıb. Belə ki, ixtisas imtahanlarının yazılı və şifahi mərhələlərini, eləcə də icbari təlim proqramını uğurla başa vuran 1 vəkilliyə namizədin andiçmə mərasimi keçirilib. O, vəkil etikası və peşə borcuna sadiq qalacağına dair and içərək kollegiyanın sıralarına qəbul olunub. Ona vəsiqə təqdim edilib və gələcək fəaliyyətində uğurlar arzulanıb.
Bundan başqa, Avropa Hüquqşünas Tələbələr Assosiasiyasının Azərbaycan nümayəndəliyi tərəfindən təşkil ediləcək “Avropa İnsan Hüquqları Məhkəməsi Simulyasiyası”nın XI və Milli Məhkəmə Müsabiqəsinin XV buraxılışlarının keçirilməsinə maddi dəstək göstərilməsi, eləcə də “Philip C. Jessup” Beynəlxalq Məhkəmə Müsabiqəsində iştirak edəcək tələbələrə maliyyə yardımının verilməsi ilə bağlı Bakı Dövlət Universitetinin Hüquq fakültəsinin müraciətləri müzakirə olunaraq müsbət qərar qəbul edilib.
Eyni zamanda, “Hüquqi yardımın göstərilməsi haqqında müqavilə”nin standart formasına “Xüsusi şərtlər” adlı yeni bölmənin əlavə olunması ilə bağlı müraciət müzakirə olunub. Nəzərə çatdırılıb ki, bu dəyişiklik vəkillə ona müraciət edən şəxs arasında bağlanan müqavilələrdə fərdi razılaşmaların daha aydın və şəffaf ifadə olunmasına, həmçinin hüquqi müəyyənliyin və müdafiənin gücləndirilməsinə xidmət edəcək.
Həmçinin iclasda bəzi vəkillərin digər vəkil qurumlarına keçməsi, 1 vəkilin vəkil kabineti yaratmaq barədə müraciətləri müzakirə olunaraq müvafiq qərarlar qəbul edilib.
İclasın davamında Vəkillərin İntizam Komissiyasının rəyləri müzakirə olunub. Rəyasət Heyətinin qərarı ilə yol verdikləri intizam pozuntularına görə 2 vəkilin fəaliyyəti müəyyən müddətə dayandırılıb, 4-nə xəbərdarlıq edilib və 1-nə isə töhmət verilib.
Sonda kollegiyanın fəaliyyəti ilə bağlı digər cari və əhəmiyyətli məsələlər də müzakirə olunub və zəruri qərarlar qəbul edilib.
