Məşhur “Evdə tək 2” filmində evsiz qadın rolunu canlandıran irlandiyalı aktrisa Brenda Friker açıqlaması ilə diqqət çəkib.
“Qafqazinfo” “Daily Mail” nəşrinə istinadən xəbər verir ki, 79 yaşlı Brenda diqqət mərkəzindən uzaq karyerası və həyatı haqqında danışıb.
“Mən sakit bir həyat yaşayıram və kiçik bir maşın sürürəm. Bunlardan başqa kottecim var, bu qədər. Vaxtımın çoxunu divar və ya itlə danışmağa, şeir yazmağa, kitab oxumağa və ya televizora baxmağa sərf edirəm. Heç kimin həyatından fərqlənmir, tək qalmaqdan başqa. Bəlkə də mən divarla hər kəsdən daha çox danışıram”, – aktrisa deyib.
Brenda aktyorluğa fasilə verməsi və psixi sağlamlıq problemlərindən də danışıb. O, bu yaxınlarda ona daha güclü antidepresanlar təyin olunduğunu açıqlayıb:
“Bu yaxınlarda həkimə getdim, dedi ki, “sizə daha güclü antidepresanlar verəcəyik”. Mən bir qədər qapalı adamam”.
Aktrisa 32 dəfə intihara cəhd etdiyini də etiraf edib.
“50 il depressiyadan əziyyət çəkdim. Amma indi həftədə bir dəfə sırf söhbət etmək və başqa insan səsini eşitmək üçün terapevtə gedirəm”.
Qeyd edək ki, “Evdə tək 1” 1990, “Evdə tək 2” isə 1992-ci ildə yayımlanıb.
