Günəş sisteminə yüksək sürətlə daxil olan nadir 3I/ATLAS kometasının yaxın aylarda hərəkət istiqaməti dəyişəcək. AzPost xəbər verir ki, araşdırma aparan beynəlxalq mütəxəssislər obyektin hərəkətini yüzlərlə fərqli ssenari üzrə modelləşdirərək bu qənaətə gəliblər.
Aparılan hesablamalara görə, 58 kilometr/saniyə sürətlə hərəkət edən və artıq 2025-ci ilin oktyabrında Günəşə ən yaxın nöqtədən keçmiş kometa əvvəlcə Marsın yanından təhlükəsiz məsafədən ötüb. Planetlə aralarındakı məsafə 0,194 astronomik vahid olub və bu görüş hərəkətinə ciddi təsir göstərməyib.
Əsas dəyişiklik isə 2026-cı ilin martında baş verəcək. Hesablamalar göstərir ki, kometa həmin vaxt Yupiterə 0,357 astronomik vahid məsafəyə qədər yaxınlaşacaq. Bu məsafə nəhəng planetin Hill radiusu ilə faktiki olaraq üst-üstə düşür. Elm adamları bildirirlər ki, Yupiterin güclü cazibə qüvvəsi kometanın Sonrakı hərəkət yolunu ciddi şəkildə dəyişdirməyə qadirdir.
Mütəxəssislər 3I/ATLAS kometasının 100 il əvvəlki və 100 il sonrakı mümkün trayektoriyalarını araşdırmaq üçün 500 fərqli modeldən istifadə ediblər. Nəticələrə görə, kometa Günəş sisteminə “Oxatan” bürcü istiqamətindən daxil olub və Yupiterlə qarşılaşmadan sonra “Əkizlər” bürcü istiqamətində sistemi tərk edəcək.
Tədqiqat həmçinin kometanın mümkün mənşəyinə dair ehtimalları da gücləndirib. Alimlərin gəldiyi qənaətə görə, 3I/ATLAS qalaktikanın incə və qalın disk bölgələrinin sərhədində formalaşıb. Bu səbəbdən onun ilkin ulduz sistemini müəyyənləşdirmək xeyli çətinləşir.
Hesablamalarda kometanın özündən ayrılan buxarların yaratdığı əlavə itələmə qüvvələrinin də təsiri nəzərə alınıb. Araşdırma göstərib ki, təqribən 10⁻⁵–10⁻⁶ astronomik vahid/gün² səviyyəsində olan bu cür qüvvələr trayektoriyaya nəzərəçarpan dəyişikliklər edir, daha zəif təsirlər isə ciddi rol oynamır.
