Cənubi Koreyanın Pusan şəhərində dar şəhər kanalında peyda olan 3,5 metrlik köpəkbalığı gözlənilmədən yerli turistik məkana çevrilib.
Bu barədə The Guardian yazır.
On gün ərzində köpəkbalığını görmək üçün əraziyə təxminən 600 min insan gəlib.
Köpəkbalığı ilk dəfə sentyabrın 18-də North Port Waterfront Park yaxınlığındakı su kanalında müşahidə olunub. Heyvana Pusanın Şimal limanının adından götürülmüş “Bukan-i” ləqəbi verilib.
Mütəxəssislər bunun bürünc köpəkbalığı olduğunu düşünürlər. Ehtimala görə, heyvan ovunun ardınca dənizdən kanala girib, lakin sonradan geri qayıda bilməyib.
Həmin gün sahil mühafizəsi köpəkbalığını dənizə qaytarmağa çalışıb. Lakin alimlərin tövsiyəsindən sonra altı saatlıq əməliyyat dayandırılıb. Mütəxəssislər xəbərdarlıq ediblər ki, heyvanı zorla çıxarmağa cəhd onun xəsarət almasına və ya aqressivləşməsinə səbəb ola bilər.
Çərşənbə axşamı xilasedicilər yeni cəhd ediblər. Qayıqlar köpəkbalığının arxasından su şırnaqları vuraraq onu kanalın çıxışına doğru hərəkət etdirməyə çalışıblar. Bu üsul 2004-cü ildə ABŞ-ın Massaçusets ştatı sahillərində dayaz suda qalan böyük ağ köpəkbalığının xilas edilməsində də tətbiq edilmişdi.
Lakin ilk cəhd uğursuz olub: köpəkbalığı qayıqların yanından keçərək yenidən kanalın içərisinə qayıdıb. Daha sonra əməliyyat yenidən dayandırılıb, çünki heyvan su hövzəsini tərk etmək istəməyib.
Cənubi Koreyanın Milli Balıqçılıq Elmləri İnstitutu bildirib ki, köpəkbalığının vəziyyəti sabit olaraq qalır. Bununla belə, mütəxəssislər qeyd edirlər ki, kanalda onun normal hərəkət etmək və qida tapmaq imkanları məhduddur. Buna görə də burada uzun müddət qalması heyvanın zəifləməsinə səbəb ola bilər.
Bu arada köpəkbalığı Pusanda əsl məşhura çevrilib. 19–28 sentyabr tarixlərində Şimal limanının yaxınlığındakı parkı 607 min nəfər ziyarət edib. Adi bayram günlərində isə həmin park gündə təxminən 2 min ziyarətçi qəbul edir.
Pusan meri Çon Çje Su da köpəkbalığının pərəstişkarlarından birinə çevrilib. Onun sözlərinə görə, heyvan hər 5–10 dəqiqədən bir suyun üzünə çıxır və əsl “ulduz xarizmasına” malikdir.
https://www.youtube.com/shorts/4NlXOeMTgiA
