Azərbaycan Avtomobil Yolları Dövlət Agentliyi (AAYDA) tərəfindən 8 Noyabr prospektində əsaslı təmir işləri sürətlə və keyfiyyətlə davam etdirilir.
AAYDA-dan bildirilib ki, paytaxtın əsas prospektlərindən biri sayılan və uzunluğu 10 kilometr olan 8 Noyabr prospekti uzun müddət əsaslı təmir olunmadan istismar edildiyindən yolun asfalt-beton örtüyündə çatlar və qabarmalar müşahidə olunurdu. Bu isə paytaxtın əsas işlək prospekti ilə rahat hərəkətə maneə yaradırdı. Layihə üzrə aparılan əsaslı təmir işləri çərçivəsində nəqliyyat vasitələrinin sürətli və maneəsiz hərəkətini təmin etmək, eləcə də yolun fasiləsiz olaraq yüksək hərəkətli buraxma qabiliyyətinin təmin edilməsi məqsədilə 8 zolaqlı (4 gediş, 4 gəliş) hərəkət hissəsinin, velosiped zolağının, bufer zonasının və səkilərin tikintisi işləri yerinə yetirilir.
Qeyd olunan işlər yüksək keyfiyyətlə prospektin Yusif Səfərov küçəsi ilə kəsişməsindən Xəqani Rüstəmov küçəsinədək, Sadıqcan küçəsi ilə kəsişməsindən Zığ dairəsi və əks istiqamətdə olan hissələrində, həmçinin layihə çərçivəsində Afiyəddin Cəlilov küçəsində yerinə yetirilərək yekunlaşdırılıb.
Hazırda əsaslı təmir işləri prospektin Xəqani Rüstəmov küçəsindən Mərkəzi Bulvar küçəsinədək (Zığ dairəsi istiqaməti) və Sadıqcan küçəsindən Ramiz Quliyev küçəsinədək (şəhər istiqaməti) olan hissəsində davam etdirilir.
Agentlik tərəfindən prospektin həmin hissələrində asfaltlanma işləri icra olunur. Qeyd olunan istiqamətlər üzrə yeni asfalt-beton örtüyünün döşənməsi işləri yekunlaşan kimi əks istiqamətlərdə də asfaltlanma işlərinə başlanılacaq.
Razılaşdırılmış layihə əsasında hərəkət zolaqlarının sayı eyni, yəni hər bir istiqamət üzrə 4 zolaq saxlanılmaqla 1,5 metr (hər bir istiqamət üzrə) enində ayrılmış velosiped zolaqları (10 kilometr) salınır, velosiped yolları eni 1,2 metr (hər bir istiqamət üzrə) olan “bufer zona”lar vasitəsilə yolun nəqliyyat vasitələri üçün nəzərdə tutulmuş hissəsindən ayrılır, ərazidə işıqlandırma səviyyəsinin yaxşılaşdırılması məqsədilə tədbirlər görülür.
