“İnanırıq ki, ikitərəfli əməkdaşlığımızın və dialoqumuzun artması, Fələstin başda olmaqla, fikir ayrılığı yaşadığımız bəzi məsələlərin həllini asanlaşdıracaq”.
Azpost.info xəbər verir ki, bunu Türkiyənin milli müdafiə naziri Hulusi Akar Ankarada səfərdə olan İsrailin müdafiə naziri Benni Qantsla görüş zamanı deyib.
“Cənab Qants uzun müddətdən sonra ölkəmizə gələn ilk İsrail müdafiə naziridir”, – Akar qeyd edib.
Akar Türkiyə ilə İsrail arasındakı münasibətlərə toxunaraq deyib: “Prezidentimizin İsrail prezidenti və baş naziri ilə qarşılıqlı görüşləri Türkiyə ilə İsrail arasındakı əlaqələr baxımından mühüm dönüş nöqtəsi oldu. Türkiyə və İsrail bölgəmizdə mühüm aktorlardır. Eyni zamanda, bizim ciddi tarixi və mədəni əlaqələrimiz var. Türkiyə ilə İsrail arasında əlaqələr və ortaq dəyərlər mövcuddur. Türkiyə olaraq İsraillə münasibətlərimizin və əməkdaşlığımızın, xüsusilə müdafiə, təhlükəsizlik və enerji kimi sahələrdə inkişafı regional sülh və sabitliyə əhəmiyyətli töhfələr verəcək”.
Akar İsrail müdafiə naziri ilə məhsuldar görüş keçirdiklərini də əlavə edib: “Siyasətimizin tələblərini, siyasətimizlə bağlı məsələləri, fikirlərimizi, qiymətləndirmələrimizi çox açıq şəkildə ifadə etdik. Xüsusilə regionumuzda sabitliyin, əməkdaşlığın və təhlükəsizliyin daha da inkişaf etdirilməsi baxımından hansı işləri görə biləcəyimizlə bağlı fikir mübadiləsi apardıq”.
Azpost.info
