Mayın 24-25-də Moskvada keçiriləcək II Avrasiya İqtisadi Forumunda 50-dən çox ölkənin nümayəndəsi iştirak edəcək.
Azpost.info xəbər verir ki, Roskonqres Fondunun təşkilatçılığı ilə baş tutacaq forum “Çoxqütblü dünyada Avrasiya inteqrasiyası” devizi altında keçiriləcək.
Rusiya Baş nazirinin müavini Aleksey Overçuk tədbirdə 500-dən çox xarici nümayəndənin iştirak edəcəyini deyib. Qonaqlar arasında BMT, ÜST və Beynəlxalq Miqrasiya Təşkilatının nümayəndələrinin də iştirakı gözlənilir.
“İştirakını təsdiqləyən 2700-dən çox forum qonağından 54 dövlətdən 500-dən çox xarici nümayəndə var. Forumda müzakirələr Avrasiya İqtisadi İttifaqına üzv dövlətlərin və Avrasiya regionu ölkələrinin hərtərəfli iqtisadi inkişafına yönəlmiş konkret praktiki həllərin işlənib hazırlanmasına yönəlib. Eyni zamanda, forum biznes dialoqu üçün platformaya çevriləcək. Orada 450-dən çox şirkətdən 650-dən çox biznes nümayəndəsi iştirak edəcək”, – Overçuk bildirib.
Əsas müzakirələrdən biri 2030-2045-ci ilə qədər olan dövr üçün dövlətlər arasında inteqrasiya məsələləri olacaq. Müzakirələrdə iştirak edənlər arasında Ermənistan baş nazirinin müavini Mqer Qriqoryan, Belarus baş nazirinin müavini İqor Petrişenko, Qazaxıstanın ticarət və inteqrasiya naziri Serik Jumanqarin, Qırğızıstan Nazirlər Kabineti sədrinin birinci müavini Adılbek Kasıməliyev də olacaq.
Forumun əsas məqsədi dövlətlər arasında münasibətləri yaxşılaşdırmaqdır.
Azpost.info
