“Ukrayna son 48 saat ərzində ölkənin şərqində hərbi əməliyyatların aktivliyini əhəmiyyətli dərəcədə artıraraq çoxdan gözlənilən əks-hücum əməliyyatına başlamış ola bilər”.
Azpost.info xəbər verir ki, bunu NATO rəsmisi CNN-ə bildirib.
Rəsminin sözlərinə görə, Ukrayna Silahlı Qüvvələri kəşfiyyat aparır və Rusiya ordusunun mövqelərinə zərbələr endirir: “Onlar bunu düşmənin müdafiəsindəki zəif yerləri müəyyən etmək üçün edirlər. Formalaşdırma əməliyyatları kimi də tanınan bu cür ön hücumlar ən azı iki həftədir ki, davam edir”.
NATO rəsmisi bildirib ki, hərbi analitiklər Ukrayna ordusunun ölkənin cənub-şərqindəki Zaporojye bölgəsində, Xerson və Zaporojye arasında və ölkənin şərqində Donetskin cənubunda bir neçə böyük əməliyyatını qeydə alıblar: “Əks-hücumun eyni vaxtda bir neçə cəbhədə baş tutacağı gözlənilir”.
Eyni zamanda, NATO nümayəndəsi etiraf edib ki, Kaxovka su elektrik stansiyasının bəndinin dağıdılması Ukrayna ordusunun planlarına təsir edə bilər. Xüsusilə, suyun yayılması qüvvələri əhalinin kütləvi evakuasiyasına kömək etməyə yönəldəcək.
Azpost.info
