İran təhlükəsizlik rəsmiləri Fələstinin HƏMAS hərəkatına İsrailə havadan və qurudan hücum planlaşdırmasına kömək edib.
Azpost.info xəbər verir ki, bu barədə HƏMAS və Livanın “Hizbullah” silahlı qruplaşmasının yüksək səviyyəli mənbələri “The Wall Street Journal”a bildiriblər.
“Oktyabrın 2-də Beyrutda keçirilən görüşdə İran İsrailə hücum etmək üçün “yaşıl işıq” yandırıb. Ona qədər İran İslam İnqilabı Keşikçiləri Korpusunun (SEPAH) zabitləri hücum planı hazırlamaq üçün avqust ayından HƏMAS-la işləyirdilər. Livanın paytaxtında “Hizbullah”ın iştirakı ilə keçirilən bir neçə görüşdə əməliyyatın təfərrüatları dəqiqləşdirilib”, – nəşr yazır.
ABŞ dövlət katibi Entoni Blinken Vaşinqtonun Tehranın İsrailə hücumda iştirakına dair sübut görmədiyini deyib. Bununla belə, adı açıqlanmayan bir Avropa rəsmisi və Suriya hökumətinin müşaviri “The Wall Street Journal”a İranın hadisələrdəki rolu ilə bağlı məlumatı təsdiqləyib.
Eyni zamanda HƏMAS-ın yüksək səviyyəli rəsmisi Mahmud Mirdavi bildirib ki, onun qruplaşması hücumu təkbaşına planlaşdırıb.
Nəşr qeyd edir ki, Tehran HƏMAS-ın İsrailə qarşı müharibəyə başlamasını açıq şəkildə dəstəkləyib: “Bugünkü əməliyyat işğal olunmuş ərazilərdə işğalçılara qarşı müqavimət və silahlı əməliyyatlar sahəsində yeni səhifə açıb”, – İran Xarici İşlər Nazirliyinin sözçüsü Nasir Kənani deyib”.
Azpost.info
