Azərbaycan Haqq və Ədalət Partiyasının (HƏP) Ali Məclisinin sədri Zəlimxan Məmmədli videomüraciət yayımlayaraq təşkilatın sədri, sabiq səhiyyə naziri Əli İnsanovu tənqid edib. “HƏP-dəki rəzalət” başlığı ilə yayımladığı videomüraciətdə Z.Məmmədli partiya sədri tərəfindən şəxsinə qarşı ədalətsiz mövqe tutulmasından, təşkilatın nizamnamə və məramnaməsinin kobud şəkildə pozulmasından, ona qarşı sosial şəbəkələrdə iyrənc kampaniyaya başlanmasından danışıb.
Məsələ ilə bağlı Azpost.info-ya danışan Z.Məmmədli bildirib ki, HƏP-lə bağlı bütün məsələlərə sözügedən videomüraciətində aydınlıq gətirib: “Dediklərimə əlavə etmək istədiyim sözlər yoxdur. Mən mübarizə adamıyam. Mən Əli İnsanovun təklifi ilə HƏP-ə gəldim, partiyanın quruculuğu, inkişafı üçün çalışdım. Fəaliyyətim də bir ay əvvələdək Əli İnsanov tərəfindən yüksək qiymətləndirildi, təşəkkür edildi. Mən mübarizəni hansısa vəzifəyə görə aparmamışam, bundan sonra da əqidəm bir olaraq qalacaq. Harada olmuşamsa Azərbaycan naminə, dövlət naminə, dövlətçilik naminə, Azərbaycanın bütövləşməsi naminə çalışmışam”.
“Əli İnsanov özü mənə partiyaya gəlmək, mübarizəni birgə aparmağı təklif etdi. Şərtlərimiz oldu, andımız oldu. Amma Əli İnsanov addımı ilə andımızı poza-poza gəldi, salam-kəlamı da tapdadı, eti sarsıtdı. Onun addımları nə partiya sədrliyinə, nə siyasətə, nə ağsaqqallığa sığır”, – deyə Z.Məmmədli əlavə edib.
Z.Məmmədli Əli İnsanovun göstərişi ilə sosial şəbəkələrdə şəxsinə qarşı iyrənc kampaniya aparanlara xəbərdarlıq edib: “Mənə bu cür iftiralar, yapışmaz. Hər kəs hər kəsi tanıyır. Mənim yolum da bəllidir, əqidəm də bəllidir. Bundan sonra HƏP səhifəsi mənim üçün qapandı”.
Anar ABDULLA
Azpost.info
