Avropaya nüvə bombası atmağı təklif edən Kremlə yaxın politoloq Sergey Karaqanov Venesiyada ikimərtəbəli evin sahibi imiş.
Azpost.info xəbər verir ki, mənzil Kastello turizm zonasında yerləşir və Karaqanovla həyat yoldaşı Yekaterinanın adınadır.
Avropaya nüvə bombası atmağı təklif etməsindən sonra Avropa İttifaqı ona qarşı şəxsi sanksiyalar tətbiq edib. Lakin bu, Kreml politoloqunun Venesiya daşınmaz əmlakının icarəyə verilməsindən gəlir əldə etməsinə mane olmur. Mənzilin yanında Karaqanovun adı yazılmış lövhə, qapı zənglərində isə qeydiyyat nömrəsi var ki, bu da əmlakın turistlərə icarəyə verildiyini göstərir.
Karaqanov Rusiya prezidenti Vladimir Putinin xarici ekspertlərlə görüşdüyü “Valday” klubunun yaradıcılarından biridir. O, Qərb ölkələrində itirilmiş özünüqoruma hissini bərpa etmək üçün nüvə ritorikasının artırılmasını təklif edib. Dediyinə görə, Putin artıq bu istiqamətdə ilk addımları atıb, lakin bu kifayət deyil.
“Rusiya nüvə zərbəsi ilə hədələməkdə davam etməlidir. Əgər Qərb geri çəkilməsə, onda ağlını itirmiş insanları özünə gətirmək üçün bir sıra ölkələrdə bir qrup hədəfi vurmalı olacağıq”, – Karaqanov deyib.
Azpost.info
