“Trampın çıxışında ölkəmizin maraqlarına toxunan əsas məsələ neftin qiymətini aşağı salacağı barədə verdiyi vəddir. Çünki ölkəmizin iqtisadiyyatı neft gəlirlərindən çox asılıdır”.
AzPost bildirir ki, bu sözləri ƏHD Partiyasının sədri, Milli Məcclisin üzvü Qüdrət Həsənquliyev mətbuat xidmətinə müsahibəsində deyib.
“Tramp enerji daşıyıcılarını satmaqla və idxal rüsumlarını artırmaqla iqtisadiyyatı gücləndirmək istədiyini bəyan etdi. Amma fərqində deyil ki, ABŞ-nin ixrac etdiyi məhsullara da ticarət tərəfdaşları tərəfindən idxal rüsumları qarşılıqlı olaraq artırılacaq”-deyə deputat vurğulayıb.
Q.Həsənquliyevin sözlərinə görə, Tramp 3-cü dünya müharibəsinə yol verməyəcəyini vəd edir. Bu, kiçik dövlətləri ərazi güzəştlərinə getməyə məcbur etmək hesabına olacaqsa, ABŞ-nin beynəlxalq nüfuzu nəinki artmayacaq, əksi baş verəcək. ABŞ-nin müttəfiqlərsiz, təkbaşına Çinlə mübarizəsi onun məğlubiyyəti ilə nəticələnəcək. Çin Tayvan üzərində dövlət suverenliyini bərpa edəcək. Tramp Panamaya hərbi müdaxilə edərsə, müttəfiqləri və qonşuları ilə ticarət müharibəsinə başlayarsa, bu, ABŞ-nin təklənməsinə səbəb olacaq.
“ABŞ-də bütün çatşmazlıqlarla yanaşı güclü dövlət institutları, hakimiyyət bölgüsü, güclü mətbuat və siyasi müxalifət var. Tramp demokratik dəyərlərdən imtina edib beynəlxalq nizamı pozsa və ölkəsinə ziyan vurmağa başlasa, bu, onun üçün yaxşı sonuclanmayacaq”.
Biz arzu edirik ki, o həm dünya, həm də öz ölkəsi üçün uğurlu lider olsun. Bizə Ermənistanla sülh sazişinin imzalanmasında kömək etsin, İran və Rusiya ilə anlaşsın, Türkiyəyə, müttəfiqlərinə güvənsin, regionda sülhə töhfə versin. Ukrayna ilə Rusiya arasında ədalətli sülhə nail olsun”.
