Azərbaycanda bu şəxslər odlu silah gəzdirə bilər.
Azərbaycanda 21 yaşına çatmış vətəndaşların mülki odlu silah əldə etmək hüququ olacaq.
AzPost APA-ya istinadən bildirir ki, bu, Milli Məclisin Müdafiə, təhlükəsizlik və korrupsiya ilə mübarizə komitəsinin bu gün keçirilən iclasında müzakirə olunub. Müzakirəyə çıxarılan “Xidməti və mülki silah haqqında” qanuna təklif olunan dəyişiklikdə əksini tapıb.
Qüvvədə olan qanuna əsasən, qanunun tələblərinə müvafiq olaraq Azərbaycan Respublikasında on səkkiz yaşına çatmış Azərbaycan Respublikası vətəndaşlarının mülki silah gəzdirə bilər.
Layihəyə əsasən, Azərbaycan Respublikasında on səkkiz yaşına çatmış vətəndaşlar odlu silah istisna olmaqla, mülki silah əldə etmək hüququ olacaq. Azərbaycan Respublikasında iyirmi bir yaşına çatmış vətəndaşlara isə mülki odlu silah əldə etmək hüququ verilir.
Dünyanın 178 ölkəsində silah gəzdirməyə icazə verilir. Bir sıra ölkələrin qanunvericiliyi vətəndaşların özünü müdafiə və yaxud da ov etmək məqsədilə odlu silah gəzdirmək hüququnu təmin edir.
Dünyada silahın saxlanmasının və satışının qadağan olduğu ölkələr də var. Bunlar Çexiya, İrlandiya, Almaniya və Böyük Britaniyadır.
Maraqlıdır ki, 2023-cü ildə ABŞ Federal Məhkəməsi narkotik aludəçilərinə silah sahibi olmaq qadağasını ləğv edib.
O vaxt qadağanın ləğv edilməsinə səbəb avtomobildə tapança və yarı avtomatik tüfəng, həmçinin marixuana ilə saxlanılan Patrik Danielsin işi olub. O, bəzən narkotikdən istifadə etdiyini etiraf edib.
Daniels dörd il müddətinə azadlıqdan məhrum edilib. Bununla belə, Federal Məhkəmə bildirib ki, ABŞ Konstitusiyasına ikinci düzəliş şəxsin özünü müdafiə məqsədi ilə ictimai yerlərdə silah gəzdirmək hüququnu qoruyur.
