Fevralın 14-də Qafqaz Müsəlmanları İdarəsinin sədri, Şeyxülislam Allahşükür Paşazadə ölkəmizdə səfərdə olan Amerika Birləşmiş Ştatlarının Stirling Fondunun İcraçı direktoru Edvard Rounu qəbul edib.
Qonağı səmimi salamlayan Şeyxülislam həzrətləri onunla Bakıda yenidən görüşməkdən məmnunluğunu ifadə edib, Stirling Fondunun dəvəti ilə ABŞ-ın Yuta ştatında olarkən keçirilən yüksək səviyyəli görüşləri yaxşı xatırladığını deyib.
QMİ sədri rəhbərlik etdiyi dini mərkəzlə Stirling Fondu arasında münasibətlərin, birgə keçirilən tədbirlərin əhəmiyyətindən danışıb, əlaqələrin davamlı olmasının vacibliyini diqqətə çatdırıb, Fondun rəhbərliyinə salam-dualarını çatdırmağı xahiş edib.
Edvard Rou qonaqpərvərliyə görə təşəkkür edərək Şeyxülislam Allahşükür Paşazadənin beynəlxalq müstəvidə dinlər və mədəniyyətlər arasında dialoqun inkişafı sahəsində çox mühüm işlər gördüyünü bildirib. Qonaq Azərbaycandakı multikulturalizm və tolerantlıq mühitini yüksək dəyərləndirib, bildirib ki, bəzi ermənipərəst senatorların Azərbaycanın Qarabağda guya etnik təmizləmə aparması, erməni dini abidələrini dağıtması barədə Senata təqdim etdiyi üç qətnamə layihəsi Stirling Fondunun səyi nəticəsində qəbul olunmayıb.
Özbəkistan Respublikasında fondun həyata keçirdiyi müxtəlif humanitar layihələr barəsində məlumat verən icraçı direktor qeyd edib ki, gələcəkdə Daşkənddə Şeyxülislam Allahşükür Paşazadənin həyat və fəaliyyətinə həsr edilən beynəlxalq konfransın keçirilməsi planlaşdırılır.
Edvard Rou Stirling Fondunun illik toplantısında fəxri qonaq kimi iştirak etmək üçün Şeyxülislam A. Paşazadəni növbəti dəfə ABŞ-ın Yuta ştatına dəvət edib. Qonaq QMİ-nin Bakıda yeni fəaliyyətə başlayan “Toleranlıq evi”nə eksponat hədiyyə edib, səfəri zamanı dünyada analoqu olmayan belə bir məkanı böyük maraqla ziyarət edəcəyini deyib.
Görüşdə Beynəlxalq Multikulturalizm Mərkəzinin İcraçı direktoru Rəvan Həsənov iştirak edib. Görüşün sonunda xatirə fotosu çəkilib.
