Azərbaycan Universitetinin
Bakıda universitetin adı piyadaların yolunu kəsir. Paytaxtın bir sıra küçə və prospektlərində səkilər müxtəlif obyektlər, o cümlədən sürücülər tərəfindən zəbt edilib.
AzPost xəbər verir ki, bu insanların rahat hərəkətini məhdudlaşdırmaqla yanaşı təhlükəli vəziyyət də yaradır. Belə ki, yolu kəsilən piyada məcbur olub hərəkət hissəsinə çıxır ki, bu da qəzalara səbəb ola bilər.
Məsələn, elə Ceyhun Hacıbəyli küçəsində Azərbaycan Universitetinin adının yazıldığı lövhə səkini tamamilə tutub. Burada hərəkət edənlər ya universitetə girməli, ya da maşınların yüksək sürətlə getdiyi yola çıxmalıdır.
Nizami, Füzuli küçəsində isə avtomobilər səkini kəsib.
Xatırladaq ki, “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı” təsdiq edilib.
Dövlət Proqramı əhaliyə keyfiyyətli nəqliyyat xidmətləri göstərilməsi, ərazinin perspektiv inkişafı nəzərə alınmaqla yol hərəkətinin bütün iştirakçılarının təhlükəsizliyinin təmin edilməsi, ümumi istifadədə olan nəqliyyat xidmətlərinin keyfiyyətinin, dayanıqlılığının və əlçatanlığının artırılması, həmçinin fərdi mobil nəqliyyat vasitələrinin, nəqliyyat və piyada infrastrukturundan istifadənin müasir tələblərə cavab verən səviyyədə təmin edilməsi və nəqliyyatda rəqəmsal texnologiyaların tətbiqi prinsipləri əsasında hazırlanıb.
Məqsəd nəqliyyat sisteminin təkmilləşdirilməsi nəzərdə tutulan Bakı şəhərində və ətraf ərazilərdə dayanıqlı nəqliyyat sisteminin qurulması, sərnişin mobilliyinin keyfiyyətinin artırılması və yol-nəqliyyat hadisələrinin, habelə ekologiyaya dəyən ziyanın həcminin azaldılması üçün zəruri tədbirlər görülməsidir.
