Misir piramidaları
Misir piramidaları insanlıq tarixinin ən sirli və heyrətamiz memarlıq nümunələrindən biridir. Min illər boyu insanlar bu nəhəng tikililərin necə inşa olunduğunu və içlərində nə gizləndiyini anlamağa çalışıblar. Piramidaların tədqiqi prosesi isə həm elmi maraq, həm də sərvət axtarışı ilə müşayiət olunub.
AzPost bildirir ki, piramidaların ilk ciddi tədqiqinə Abbasi Xilafəti dövründə başlanılıb. Xəlifə Məmun əmr verərək, Böyük Xüfyu piramidasına süni giriş yolu açdırıb. Məqsəd, içəridə dəfn olunmuş fironun yanında gizlədilmiş xəzinəni tapmaq idi. Girişin qazılması zamanı daşların çıxardığı səslər, içəridəki boşluqları aşkar etməyə imkan verib və bu, orta əsr texnologiyası üçün əhəmiyyətli nailiyyət hesab olunub.
Piramidalar təkcə tarixi və dini baxımdan yox, həm də mistik xüsusiyyətləri ilə araşdırmaçılarda xüsusi maraq doğurub. Rəvayətlərə görə, bəzi tədqiqatçılar piramida daxilində qəribə enerjilər hiss edib, bəziləri isə oradakı yazılardan və simvollardan təsirlənərək müxtəlif psixoloji hallarla üzləşiblər.
XIX əsrdə Avropa arxeoloqları Misirə səfərlər edərək sistemli qazıntılar aparmağa başlayıblar. Bu dövrdə bir çox qiymətli artefaktlar Avropa muzeylərinə daşınıb. Ancaq bəzi ekspedisiyalar zamanı müəmmalı hadisələr baş verib – qəfil xəstəliklər, bədbəxt hadisələr, hətta izah olunmayan ölümlər bu sirli tikililərin “lənətinə” inamı artırıb.
Maraqlı faktlardan biri də, bəzi alimlərin mumiyaları tədqiq etdikdən sonra tezliklə xərçəngə tutulmasıdır. Müasir tədqiqatlar göstərib ki, bəzi mumiyalarda radioaktiv maddələr və zəhərli mikroorqanizmlər olub, bu da xəstəliklərin səbəbi kimi göstərilir.
Bu gün də Misir piramidaları tam şəkildə açılmamış sirrlərlə doludur. Yeni texnologiyalarla aparılan tədqiqatlar sayəsində gizli otaqlar və istifadə olunmuş mühəndislik üsulları bir-bir ortaya çıxır. Lakin onların əsl məqsədi, ruhani dəyəri və tikinti sirri hələ də bəşəriyyət üçün tam açılmamış qalır.
