Parol
Texnologiya inkişaf etdikcə internet təhlükəsizliyi mövzusu da daha çox ön plana çıxır. AzPost xəbər verir ki, 2025-ci ildə ən çox rast gəlinən kibertəhlükə növlərindən biri də zəif şifrələr səbəbindən hesabların ələ keçirilməsidir. Mütəxəssislər bildirir ki, istifadəçilər hələ də “123456”, “password”, “qwerty” kimi sadə şifrələrdən istifadə edir və bu da ciddi təhlükə yaradır.
Kibertəhlükəsizlik sahəsinin peşəkarları hesab edir ki, güclü şifrə ən azı 12 simvoldan ibarət olmalı və böyük hərf, kiçik hərf, rəqəm və xüsusi simvolları birləşdirməlidir. Məsələn, Xz!7Kp9m@Qw3 kimi təsadüfi yaradılmış şifrə həm sındırılması çətin, həm də təhlükəsiz hesab olunur.
2025-ci ilin ən təhlükəsiz şifrə trendləri arasında şifrə menecerlərindən istifadə etmək də önə çıxır. “Bitwarden”, “1Password” və “LastPass” kimi proqramlar hər hesab üçün unikal və güclü şifrə yaradır, onları yadda saxlayır və istifadəçini təhlükəsizlikdən qoruyur.
Bundan əlavə, şifrə seçimində şəxsi məlumatlardan — ad, doğum tarixi, telefon nömrəsi və yaxud istifadəçi adı kimi məlumatlardan istifadə etmək qəti qadağandır. Çünki belə parollar sosial mühəndislik metodları ilə asanlıqla tapıla bilər.
Mütəxəssislər istifadəçilərə iki faktorlu identifikasiya (2FA) sistemlərini aktiv etməyi də tövsiyə edir. Bu üsul hesabın təhlükəsizliyini xeyli artırır və əlavə yoxlama tələb edir.
2025-ci ilin ən təhlükəsiz şifrə nümunələri kimi bu cür kombinasiyalar təklif olunur: Ht@9zL&2wM#X, Zp$Q7mR8^vL1 və ya @F3xLp9!WzQ2. Mütəxəssislər bu kimi təsadüfi və fərqli simvollarla zəngin parollardan istifadəni tövsiyə edir.
Sonda isə bir vacib xəbərdarlıq: Eyni şifrəni birdən çox hesabda işlətmək ən böyük təhlükədir. Hər platforma üçün fərqli və güclü şifrə yaratmaq internetdə şəxsi məlumatların təhlükəsizliyini qorumaq üçün əsas şərtdir.
