Baku electronics
Əhmədli sakini Mehman Nəsirov “Baku Electronics”in servis xidmətindən narazılığını bildirib.
AzPost xəbər verir ki, onun sözlərinə görə, Tefal markalı ətçəkən cihazı təmir üçün servizə təhvil verib və ona diaqnoz olaraq dişli çarxın xarab olduğu deyilib. Cihaz 29 manatlıq təmir olunduqdan sonra aprelin 25-də təhvil alınıb. Lakin müştərinin bildirdiyinə görə, cihaz istifadəyə verilən gün düzgün işləməyib, səslər çıxarıb və sonda tüstülənib.
Mehman Nəsirov məsələ ilə bağlı yenidən servis mərkəzinə müraciət etdiyini, lakin orada xoş qarşılanmadığını deyir. Onun sözlərinə görə, servis əməkdaşları məsuliyyəti üzərindən atmağa çalışıblar. Müştəri belə hallar səbəbindən servis xidmətlərinə etibarın azaldığını bildirir.
“Baku Electronics” isə məsələyə rəsmi cavab verib. Onlar müştərinin yaşadığı narahatlıqdan təəssüf hissi keçirdiklərini bildirərək, araşdırma üçün əlavə məlumatların təqdim olunmasını istəyiblər. Şirkət, müvafiq məlumatlar daxil olduqdan sonra məsələ ilə bağlı araşdırma aparılacağını və nəticə barədə məlumat veriləcəyini bildirib.
Sosial şəbəkələrdə digər vətəndaşlar da məsələyə münasibət bildiriblər. Onların fikrincə, Azərbaycanda servis xidmətləri əlavə gəlir mənbəyi kimi istifadə olunur və məhsula sahib çıxmaqdan yayınırlar. Vətəndaşlardan biri xaricdə yaşadığı müsbət təcrübəni bölüşərək, eyni problemi xarici şirkətlərin müştəri məmnuniyyətini əsas tutaraq həll etdiklərini qeyd edib.
Məsələ ictimai müzakirəyə səbəb olub və bir daha müştəri hüquqlarının müdafiəsinin vacibliyini gündəmə gətirib.
