Mağaza direktorları yetkinlik yaşına çatmayan qəsbçilərin qurbanı olublar.
Moskvanın cənubunda iki ərzaq mağazasının direktorları yeniyetmə qəsbkarların hədəfinə çevriliblər. AzPost xəbər verir ki, bu barədə Rusiya Daxili İşlər Nazirliyinin Moskva üzrə Baş İdarəsinin mətbuat xidməti məlumat yayıb.
Hadisə Şipilovskaya və Marşal Zaxarova küçələrində yerləşən mağazalarda baş verib. 17 yaşlı qız alıcı qismində mağazalara daxil olaraq spirtli içki alıb. Daha sonra onun üç kişi ortağı mağaza rəhbərliyinə yaxınlaşaraq özlərini guya mövcud olmayan bir ictimai təşkilatın nümayəndələri kimi təqdim ediblər.
Onlar mağaza əməkdaşlarını azyaşlıya spirtli içki satdıqlarına görə hüquq-mühafizə orqanlarına məlumat verəcəkləri ilə hədələyərək pul və məhsul tələb ediblər. Hədə-qorxu nəticəsində mağaza direktorları onlara müəyyən miqdarda pul və ərzaq məhsulları veriblər.
Hadisədən sonra mağaza rəhbərləri hüquq-mühafizə orqanlarına müraciət ediblər. Faktla bağlı araşdırma aparılıb və şübhəli şəxslər saxlanılıb.
