Şimali Koreya
Şimali Koreya Qərbin Rusiya ilə əməkdaşlığa dair səsləndirdiyi tənqidləri sərt şəkildə pisləyib. AzPost xəbər verir ki, Koreya Xalq Demokratik Respublikasının diplomatları Çoxtərəfli Sanksiya Monitorinq Qrupunun Rusiya ilə dostluq münasibətlərinə dair hesabatına münasibət bildiriblər.
Diplomatların şərhini ölkənin Milli Mərkəzi Xəbər Agentliyi (KCNA) yayımlayıb. Bildirilir ki, heç bir dövlətin, o cümlədən ABŞ və onun müttəfiqlərinin suveren ölkələr arasında qurulan qanuni münasibətləri qiymətləndirmək səlahiyyəti yoxdur.
KXDR Xarici İşlər Nazirliyi bəyan edib ki, beynəlxalq qaydaları pozan tərəf Qərbin özüdür və Şimali Koreya ilə Rusiya arasında qarşılıqlı əməkdaşlıq dostluq və bərabərhüquqlu münasibətlər əsasında həyata keçirilir.
Qeyd edək ki, Çoxtərəfli Sanksiyalar Monitorinq Qrupunun hazırladığı hesabatda Şimali Koreya və Rusiya arasında strateji əməkdaşlıqdan narahatlıq ifadə olunub. Qurumun üzvləri bu münasibətlərin BMT Təhlükəsizlik Şurasının qaydalarına zidd olduğunu iddia edib.
KCNA-nın məlumatına görə, bu cür aqressiv ritorika və birtərəfli yanaşmaların nəticələri olacaq. Rəsmi Pxenyan Qərbin siyasi təzyiqlərini qəbul etmədiyini və bundan sonra da Moskva ilə strateji əməkdaşlığı davam etdirəcəyini bəyan edib.
