“İmperiya-Azərbaycan münaqişəsi rus xalqı, onun dili və ya mədəniyyəti ilə deyil, onun siyasi elitası və imperiya ideologiyasının daşıyıcıları ilə baş verir və sabitləşməyə meyllidir“.
AzPost bildirir ki, bu sözləri Azərbaycanın sabiq xarici işlər naziri Tofiq Zülfüqarov Moskva-Bakı münasibətlərini şərh edərkən yazıb.
Onun sözlərinə görə, tərəflər arasında “barışığa” işarə edən vizual siyasi hadisələr olmayacaq: “Şəxslərarası ünsiyyət qaydalarına xas olan üzrxahlıq, peşmançılıq və ya buna bənzər bir şey görməyəcəyik. Mövzu tədricən aktuallığını itirəcək və xəbər lentlərindəki digər hadisələrə yerini verəcək”.
T.Zülfüqarovun fikrincə, lakin bu o demək deyil ki, Moskvada və ya Bakıda baş verənlərdən çıxan dərslərə məhəl qoymayacaqlar.
“Onları qısaca necə formalaşdırmaq olar:
– Bakı dilemmanı aydın şəkildə ortaya qoydu: Ya Moskvadan uzaqlaşmaq, ya da hörmətli qonşuluq qaydalarına qeyd-şərtsiz riayət etmək;
– Moskva imperiya hökmranlığı naminə qarşılıqlı strateji fəaliyyətdən imtina etməyə hazır olduğunu nümayiş etdirdi.
-Hər iki paytaxt bəyan etdi ki, qarşıdurma və ya onun dərinləşməsi heç bir tərəfin maraqlarına uyğun deyil.
Güman etmək lazımdır ki, müəyyən müddət ərzində kommunikasiyalar protokol və diplomatik prosedurlarla məhdudlaşacaq və xüsusi xidmət orqanları müvafiq olaraq müxtəlif növ “təsir agentləri”nin fəaliyyətini bloklayacaqlar.
Beləliklə, biz münasibətlərin soyuduğu bir dövr yaşayırıq. Əgər bu, “soyuq müharibə”yə çevrilməsə, gərginliyin zəiflədilməsi yaxud “yenindənyüklənmə” çox vaxt aparmayacaq. Təbii ki, söhbət günlərdən yox, aylardan gedir”.
