Quba rayonu, Dəvədabanı massivində mobil rabitə ilə bağlı ciddi problemlər yaşanır.
AzPost-un redaksiyasına daxil olan müraciətdə uzun illərdir Azercell abunəçisi olan bir vətəndaş bu ərazidə mobil siqnalın yox səviyyəsində olduğunu bildirir.
Şikayətçiyə görə, zəng etmək, zəng qəbul etmək, SMS göndərmək və mobil internetdən istifadə etmək ya mümkün deyil, ya da böyük çətinliklə baş tutur. Bu hal həm gündəlik fəaliyyətinə, həm də şəxsi təhlükəsizliyinə mənfi təsir göstərir.
Vətəndaş qeyd edir ki, problemin fərdi şəkildə həlli üçün siqnal gücləndirici cihazlardan istifadə etmək imkanı olsa da, bu məsələ operator səviyyəsində araşdırılmalı və aradan qaldırılmalıdır. Azercell-ə ünvanlanan rəsmi müraciətdə texniki heyətin əraziyə baxış keçirməsi və şəbəkənin keyfiyyətinin artırılması tələb olunur.
Şikayətdə həmçinin qeyd olunur ki, Azercell-in rəsmi veb saytı işləmədiyindən və ərazidə şəbəkə olmadığı üçün tətbiqə giriş də mümkün deyil. Operatorla əlaqə saxlamaq cəhdləri isə yalnız “aidiyyəti qurumlara çatdıracağıq” cavabları ilə nəticələnir.
Abunəçi Azercell-in müştəri məmnuniyyətini əsas prioritet kimi dəyərləndirəcəyinə və problemin qısa zamanda aradan qaldırılacağına ümid etdiyini vurğulayır.
Qarşı tərəfin mövqeyi olarsa yazı yenilənəcək.
