Qəza
Abşeron Rayon Məhkəməsində yol qəzası törətməkdə təqsirləndirilən Tural Babayevin (soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Abusət Qasımovun sədrliyi ilə keçirilən prosesdə hökm oxunub.
Məhkəmənin hökmü ilə o, cəzasını məntəqə tipli cəzaçəkmə müəssisəsində çəkməklə 1 il müddətə azadlıqdan məhrum edilib.
İttihama görə, hadisə 23 dekabr 2023-cü il tarixdə, saat 08:30 radələrində Abşeron rayonu, Xırdalan şəhəri ərazisində qeydə alınıb.
Belə ki, Tural Babayev idarə etdiyi “Toyota Prius” markalı avtomobillə hərəkətdə olan zaman yolun sol kənarında təmizlik işləri görən piyada, zərərçəkmiş Zəminə Həsənovanı (adı, soyadı şərtidir) vurub. Xəstəxanaya çatdırılan yaralının həyatını xilas etmək mümkün olub.
Hadisədən sonra Tural Babayev saxlanılaraq cinayət məsuliyyətinə cəlb edilib.
Qeyd: Zəminə Həsənova Abşeron rayonu, Xırdalan şəhəri, 4 saylı Mənzil Kommunal İstehsalat Birliyində xadimə işləyir.
