Starexglobal.az
Sosial şəbəkələrdə “Starexglobal.az” kargo şirkəti ilə bağlı narazılıqlar səngimək bilmir.
AzPost xəbər verir ki, vətəndaş Ümid Xəzəroviç “Starex Global” şirkətini ardıcıl olaraq qeyri-şəffaflıqda, zəif müştəri xidməti və çatdırılma prosesində fırıldaqçılığa bənzər hallarda ittiham edib. Onun sözlərinə görə, Temu platformasından sifariş etdiyi mallar artıq ikinci dəfədir ki, yanlış prosedura görə ona çatdırılmır və guya müştərinin istəyi ilə depoya təhvil verildiyi qeyd olunur.
“Qaynar xəttinizə düşmək olmur. 1-ə basıram, vəssəlam – dərin sükut. Kuryer siqaret çəkib qayıdır və deyir ki, guya mən depoya yönləndirilməsini istəmişəm. Halbuki bu, həqiqətə uyğun deyil,” – deyə o, sosial şəbəkə paylaşımında bildirib.
Şirkət isə bu iddialara rəsmi şəkildə cavab verib. “Starexglobal.az”ın paylaşımında bildirilir:
“Kuryer əməkdaşımız ünvana çatdıqda müştəri ilə əlaqə yaratmaq mümkün olmadıqda və ya müştəri ünvanında olmadıqda, sistemə uyğun olaraq bağlama müştərinin qeyd etdiyi ünvana yaxın filialımıza yönləndirilir. Hazırda bağlamanız Naxçıvan filialımızdadır.”
Şirkət əlavə olaraq qeyd edib ki, müştəri bağlamasını Naxçıvan şəhəri, 12-ci məhəllə 4/17 ünvanında – Cahan Ticarət Mərkəzi ilə üzbəüz yerləşən filialdan təhvil ala bilər.
Qeyd edək ki, bu kimi hallarda vətəndaşların şikayətlərinin operativ araşdırılması və şəffaf şəkildə cavablandırılması həm xidmət keyfiyyətinin, həm də ictimai etibarın qorunması baxımından vacibdir.
